Оралда алдағы оқу жылында жеті мыңға жуық оқушы бірінші сыныпқа барады.
Бұл туралы қалалық білім беру бөлімінің баспасөз қызметі мәлімдеді. 2022-2023 оқу жылына 1-сыныпқа қабылдау 1 тамызда аяқталғаны белгілі. Орал қаласы бойынша 1- сыныпқа 6936 оқушы қабылданған. Нәтижесінде, бұл көрсеткіш өткен жылғы балалар санынан 600-ге көбейгені байқалған. Сонымен қатар ата-аналарының және заңды өкілдерінің өтінішіне сәйкес, қабылданған оқушылардың 65 пайызының, яғни 4484 баланың қазақ сыныптарында, 2452 бүлдіршіннің орыс сыныптарында білім алатыны белгілі болған.
– Қазіргі уақытта қаланың барлық мектептерінде «Балақайлар мектебі» жұмысын бастады. Мектеп табалдырығын алғаш аттайтын оқушыларға арналған дайындық курсының мақсаты – оларды мектеп өміріне бейімдеу. «Балақайлар мектебінің» көмегімен балалар ойын түріндегі негізгі дағдыларды игеріп, шығармашылық қабілеттерін дамытады. Мұндағы сабақтар жадыны, моториканы дамытуға және сөйлеуді, жазуды, сурет салуды үйретуге бағытталған, – деді білім беру бөлімінің баспасөз хатшысы Э.Нұғманова.
