Қыркүйектің соңына қарай Қытайдың XIV ұлттық ойындары өтіп, ел біріншілігінде бокстан ерлер арасында 75 келіде сынға түскен Шынжаң командасының боксшысы Тоқтарбек Таңатқанұлы жеңімпаз болды. Ол финалда тағы бір қандасымыз Бейжің құрамасының мүшесі Ұлпар Қарқынұлын 5:0 есебімен жеңіп, чемпион атанды. Ал үшінші орын Хэнань командасының былғары қолғап шебері Тао Минсиға бұйырды. Айта кетерлігі, Тоқтарбек Таңатқанұлы – Қанат Ислам және Мәметтұрсын Чоңнан кейінгі Қытай атынан Олимпиадалық ойындарға қатысқан үшінші шыңжаңдық боксшы. Күміс медаль еншілеген Ұлпар Қарқынұлы бүгінгі күні бокс әлемінде өзіндік аты шығып жүрген спортшылардың бірі. Қазір бокстан Бейжің командасында өнер көрсетіп жүр.
