«Ел ұйытқысы – ене мен келін»

Кентау қаласындағы Ш.Қалдаяқов атындағы мәдениет үйінде «Ел ұйытқысы – ене мен келін» атты тақырыппен отбасылық сайыс ұйымдастырылды. Қалалық ішкі саясат бөлімі мен орталық мешіт бірлесіп өткізген іс-шараның мақсаты отбасы құндылығын насихаттап, жастардың бойына отансүйгіштік қасиетті сіңіру болды. Үміткерлер бес кезең бойынша сынға түсті. Олар өздерін таныстырғаннан кейін әдет-ғұрып, салт-дәстүрге байланысты сұрақтарға жауап беріп, ертегі, бесік жырын айтудан жарысты. Сонымен қатар, қатысушылар шаңырақтың шайқалмауындағы ененің алатын орны мен ұрпақ тәрбиесіндегі келіндердің рөлін, ене мен келін арасындағы жарасымды сыйластықты көрсете білді. Нәтижесінде бас жүлдеге Кульдеевтер әулетінен келген Аршын апа және оның келіні Ару лайық деп танылды. Истыбаевтар әулетінің атынан келген Айгүл апа мен оның келіні Зейнеп І орынды иеленді. ІІ орын Туребаевтар әулетінің атынан келген Айжан апа мен оның келіні Ғазизаға, ІІІ орын Омарқожа әулетінен келген Шолпан апа мен келіні Әлияға бұйырды. Шара барысында мешіт жанынан «Домалақ әжелер мектебі» және «Ханшайым» қыз-келіншектер мектебі құрылып, лентасы қиылды. Қазақ халқы әу бастан қыз баласын аса қадірлеп, ардақты аналарды құрметтеген. Қарындасты қорғап, аруларды аялаған. Қазақылықтың қаймағы сақталған Түркістан өңірінде де нәзікжандылардың құқығын қорғау, оларды жан-жақты қолдау бағытында бірқатар жұмыстар жүргізілуде. Облыс театрларында қойылған «Бөрте», «Домалақ ана», «Фариза» спектакльдері мен ене мен келін арасындағы сыйластықты арттыруға арналған тәрбиелік мәні зор іс-шаралар соның дәлелі. Мұның бәрін де аналарға, аруларға деген құрмет деп білуге болады. Түркістан – халық саны жағынан еліміздегі көшбасшы өңір. Тиісінше көпбалалы аналар саны жағынан да ел бойынша алдыңғы орында. Жыл сайын республикамызда дүниеге келетін 400 мыңнан астам баланың әрбір жетіншісі Түркістан облысының еншісінде. Бүгінде өңірде 179 мың көпбалалы ана тұрады. 2500 «Батыр ана», 17 мыңға жуық «Алтын алқа» иегерлері саналы ұрпақ өсіруде. 44 мыңға жуық «Күміс алқа», 4 мың «Ана даңқы» орденінің иегерлері бар. Ардақты аналарымыз тек отбасының ұйытқысы ғана болып қоймай, қоғамның барлық саласында жемісті еңбек етіп келеді.