Бүгінге дейін бірқатар ірі кәсіпкер мен өндіріс ошағы аталған үндеуді қолдап, облысқа ондаған миллиард теңге инвестиция құюға дайын екенін мәлімдеді. Біздегі ақпаратқа сәйкес өзге де кәсіпкерлер қолдау көрсетуге дайын отыр. Сондықтан Абай облысындағы бұл үрдісті декларативті түрдегі қолдаудан гөрі, нақты экономикалық жобалармен астасып жатқан жаңалық деп қабылдауға негіз бар.
Үндеуге үн қосқандар
👉Алғаш болып қолдау білдіргендердің қатарында көкпектілік кәсіпкерлер болды. Болат Бекбердинов бастаған шаруашылық өкілдері әлеуметтік жобаларға қатысуға, форум аясында инвестициялық ұсыныстар беруге әзір екенін білдірді.
👉«Силикат» ЖШС бас директоры Жұмабек Ибраев осы бастамаларды қолдауға және облыстың өркендеуіне өз үлесін қоса беруге дайын екенін айтты. «Силикат» ЖШС – өңір экономикасының дамуына елеулі үлес қосып келе жатқан кәсіпорындардың бірі. Компания құрылыс индустриясы мен әлеуметтік жобаларды дамытуға ерекше көңіл бөледі.
Бұдан өңірлік бизнес қауымдастықтың жауапкершілік деңгейінің артқанын аңғаруға болады.
Ірі инвестициялық жобалар – экономикалық өсудің қозғаушы күші
Қолдау білдірген кәсіпкерлердің инвестициялық ниеті мынадай нақты жобалардан көрініс тапты:
👉«Универсал СМ» ЖШС – 10 млрд теңгеден астам инвестиция көлемімен ағаш өңдеу зауыты мен «Бақты» кеден бекетінде көлік-логистикалық хаб салуды көздеп отыр.
👉«СемАЗ» ЖШС – машина жасау саласындағы алпауыт зауытты жаңғыртып, 15,5 млрд теңге инвестиция тартпақ. Бұл жоба жүздеген жаңа жұмыс орнын ашып, экспорт әлеуетін арттырмақ.
👉«QAZAQ ASTYQ GROUP» ЖШС – өсімдік майын өңдеу және бұршақ тұқымдастарды өңдеу бойынша екі ірі өндіріс орнын іске қосуда. Жалпы инвестиция көлемі – 12,2 млрд теңге. 160-тан астам тұрақты жұмыс орны ашылады.
Бұл бастамалар қандай нәтиже береді?
👉Біріншіден, жаңа жұмыс орындары ашылады. Аталған төрт жобаның аясында кемінде 400-500-ге жуық жаңа жұмыс орны ашылу мүмкіндігі жоғары. Бұл – әсіресе елді мекендер мен моноқалалы аудандар үшін маңызды әлеуметтік көрсеткіш.
👉Екіншіден, өңірлік салық базасы артады. Жаңа өндіріс ошақтары облыс бюджетінің салық түсімдерін арттырып, әлеуметтік жобаларды қаржыландыруды ұлғайта алады.
👉Үшіншіден, өндірістік инфрақұрылым өседі. «Бақты» кеден бекеті, агроөндіріс кешендері мен машина жасау зауыты сынды нысандар облыстың ұзақмерзімді экономикалық картасында стратегиялық маңызға ие болады.
👉Төртіншіден, Абай облысының инвестициялық имиджі нығаяды. Кәсіпкерлердің туған жеріне инвестиция сала бастағанда, бұл сыртқы инвесторларға да «Бұл өңірге сенім бар» деген мықты сигнал болмақ.
«Туған жерге туыңды тік» нақты экономикалық нәтижеге негізделген мемлекет пен бизнес синергиясының формуласы болып қалыптасуына негіз бар.
Бастамаға қосылған әрбір кәсіпкер – өңірдің болашағына жауапкершілікпен қарайтын азамат. Егер осындай қадамдар жүйелі сипат алса, Абай облысы алдағы 4-5 жылда экономикалық дамудың жаңа сатысына көтерілуі әбден мүмкін.
