2024 жылы Абай облысының оқушылары зияткерлік конкурстар мен олимпиадалардың республикалық кезеңдерінде жалпы есепте 96 медаль жеңіп алды. Олардың ішінде 18 алтын, 29 күміс, 49 қола. Сондай – ақ, 10 оқушы мен 3 команда халықаралық байқаулар мен олимпиадалардың жеңімпаздары атанған. Бұл туралы Абай облысының өңірлік коммуникациялар қызметінде Абай облысының білім басқармасы Дарындылықты және қосымша білім беруді дамытудың облыстық ғылыми-әдістемелік "Дарын" орталығы директоры Светлана Оспанова баяндады.
- 9-11 сынып оқушылары үшін жалпы білім беретін пәндер бойынша республикалық олимпиаданың аудандық кезеңіне 2024 жылы 3 805 оқушы қатысты, бұл 9-11 сынып оқушыларының жалпы санының 19% құрайды. Республикалық олимпиаданың облыстық кезеңіне аудандық кезеңнің жеңімпаздары қатысады. Жеке өтініш бойынша облыстық кезеңге облыстың олимпиадалық резервінің құрамына кірген оқушылар, сондай - ақ бірдей балл жинаған аудандық кезеңнің жеңімпаздары қабылданады, - деп атап өтті Светлана Оспанова.
2024 жылы республикалық кезеңге 62 оқушы қатысып, 14 медаль жеңіп алған (алтын – 3, күміс – 5, қола – 6). Бұл көрсеткіш былтырғы қарағанда екі медальға жоғары.
- Бородулиха ауданы үздік нәтижелер көрсетуде. Оқу жылындағы қатысушылар санының 43% - ы жеңімпаз және жүлдегер атанды. Олардың ішінде 6 оқушы республикалық кезеңге жіберіліп, 4 қатысушы жүлделі орындарға ие болды. Атап айтсақ 3 алтын медаль, 1 қола медаль. Және де үшеуі жоғары оқу орындары гранттарының иегерлері атанды, - деп қосты спикер.
Сонымен қатар, зерттеу жобалары байқауының республикалық кезеңіне 2024 жылы 24 оқушы қатысып, 21 жобаны ұсынды. 12 оқушы жеңімпаз және жүлдегер атанды: 2 алтын медаль, 4 күміс, 6 қола, 2 білім гранты. Байқаулардың республикалық кезеңіне қатысу қорытындысы бойынша Абай облысының командасы жалпы командалық есепте екінші орынға ие болғанын Светлана Оспанова атап өтті.
- Сондай-ақ, облыс оқушылары Президенттік олимпиадаға, "Менің кіші Отаным" республикалық зияткерлік байқауына, химиядан жасөспірімдер олимпиадасына және математикадан Ұлттық олимпиадаға қатысты. Барлық оқушылар грамоталарға ие болды, жүлдегерлер де, жеңімпаздар да бар, - деді Светлана Оспанова.
Өңір оқушылары халықаралық олимпиадалар мен конкурстарға қатысқан. Мысалы, Әбу Райхан әл-Бируни химия олимпиадасында күміс медальді Асланбек Акрамов, Информатика бойынша еуропалық жасөспірімдер олимпиадасы (EJOI) - Қазақстан құрама командасының құрамында Әлем Аменов күміс медаль жеңіп алса, ал Шәкәрім атындағы №5 көпсалалы гимназия командасы Индонезия чемпионатында қола жүлдеге ие болған.
