Бала денсаулығына ата-анадан жауапты жан жоқ. Олар баланың шыр етіп дүние есігін ашқаннан бастап, есейіп, отау тіккенше өміріне алаңдап отырады.
Ал әлемге тізесін батырған коронавирус індеті қылаң берген шақтан бастап, ата-ананың көзі құлыншағынан еш таяр емес. Дегенмен, індетті ауыздықтаудың жалғыз жолы - вакцинациялау. Бұл бала болашағына сенімді қадам. Соңғы уақытта ата-аналар жасөспірімдер мен жүкті және бала күтіміндегі аналарға салынатын америкалық "Pfizer" екпесіне деген қозқарасы өзгеріп, екпе қабылдауда белсенділік танытуда.
Бүгін Бесағаш ауылдық округінің әкімі Бейбіт Нигматуллаев қызы Гаухар Бейбітқызына екпе ектіртті.
Ауылдық округке екпе ектіруге келген жылжымалы диагностикалық кешенде екпе қабылдаған Гаухар жарты сағат дәрігерлердің назарында болды.
– Әлемге жайлаған індеттің салқынын сезінгеннен кейін айналаға қарайласып қалдық. Отбасымызбен барып екпе қабылдағанымыз бар. Бүгін қызымды ертіп, екпе қабылдаудан сәтті өттік. Ешқандай жайсыздық сезінген жоқ. Барша ата-аналарға баланың болашағы үшін екпе ектіруге шақырамын, - дейді Бейбіт Сұңғатұлы.
Аудандық орталық ауруханасы бас дәрігерінің орынбасары Нұрмахан Мәуленовтың айтуынша, өңірге 630 доза екпе жеткізілсе, бүгінде оның жасөспірімдерге 286 дозасы, жүкті әйелдерге 20, бала емізетін әйелдерге 84 дозасы салынған.
