Ақтау шаһарының аумағы солтүстік-батыс бағытқа қарай ұлғайып келеді. Жаңа шағынаудандарда қарқын алған тұрғын үйлердің құрылысы – осының айқын айғағы. Үдемелі даму мен өрісті өркендеуге бет бұрған ақмаржан қалада жаңа қоныстанған халықтың қарасы да қалың. Сәйкесінше қала өркениетінің негізгі көрсеткіші – инженерлік инфрақұрылым желілерімен сапалы қамту саласына жүктеме мол. Ал қала халқын, әсіресе жаңа шағынаудандардың тұрғындарын толғандыратын ең басты мәселе – ауызсумен үздіксіз қамтуды үйлестіру.
Қазіргі таңда тұрғындарды сумен ұдайы қамтуға, әрі су қысымының төмендігін жоюға жұмыстар жүргізіліп жатыр. «Ақтау қаласы мен қалаға іргелес елдімекендердегі жалпы халық саны – 205 мың адам. Ал «МАЭК-Қазатомөнеркәсіп» кәсіпорнының қуаты тәулігіне 52 мың текше метр суды тұщытуға бағытталған және бұл халықты толық қамтамасыз ету үшін жеткіліксіз. Әсіресе, 31, 32, 33, 36-40 шағынаудан аралығында судың тапшылығы байқалады. Бірақ бұл су көлемі азайды деген сөз емес. Жыл сайын жаз мезгілінде кәсіпорынның су өндіру қуаты жетімсіздігінен ауызсу халыққа кестеге сәйкес және төмен қысыммен беріледі. Айта кетейік, зауыттан шыққан су тек қала тұрғындарымен қоса өнеркәсіпке де жөнелтіледі, сондықтан қаладағы коммуналдық қызметтер су қысымын шектеуге мәжбүр, бірақ бұл белгілі бір уақытқа ғана», – деді Бекбол Орынбасаров. Жуық арада «МАЭК-Қазатомөнеркәсіп» ЖШС «Доу-9» деген қондырғыны қоспақшы. «Каспий» су тұщыту зауыты да 5 мың текше метр өндіретін қосымша қондырғысын орнатады. Бұл – Ақтау қаласының халқы үшін ауызсу тапшылығы мәселесі толықтай шешіледі деген сөз.
