Атырау қаласында 15 спорт нысаны салынады. Спорт және балалар ойын алаңы Геолог, Балауса, Елшібек, Сарықамыс, Байтақ, Өркен, Жерұйық, Бірлік, Сарыөзек, Көкарна ықшамаудандарында салынады. Бұл туралы Өңірлік коммуникациялар қызметі хабарлайды.
Атырау қалалық құрылыс бөлімінің жобалау-сметалық құжаттама секторының меңгерушісі Арман Абдоловтың айтуынша, құрылыс шілденің аяғында басталады.
– Қазіргі уақытта аталған құрылыстарға жобалау-сметалық құжаттама жасалды. Конкурс жарияланып, бес мердігер мекеме жеңімпаз атанды. Аталған елді мекендерге футбол, баскетбол, воркаут алаңдарын салу жоспарланған. Сондай-ақ вандализмнің алдын алу үшін құрылысқа жоғары сапалы материалдар пайдаланылады. Жоспар бойынша қазанда қолданысқа беріледі, – деді А.Абдолов.
Бұған дейін Қайыршақты, Дамба, Талғайран, Алмалы елді мекендерінде спорт және ойын алаңдары ел игілігіне берілді.
