Білім алушылардың шығармашылығын, танымдылығын, интеллектуалды бастамаларын дамыту, дарынды оқушылардың таланттарын арттыру мақсатында өткізілген «Өнертапқыштыққа алғашқы қадам» республикалық байқауының облыстық кезеңінде Түркістан облысы Ордабасы ауданы «Темірлан» жалпы білім беретін мектебінің 8-сынып оқушысы Турегелдин Арон жүлделі III орын иеленді.
Байқаудың мектепішілік кезеңінде қазіргі білім алушылардың арасында өнертапқыштық қабілеті жоғары, ой-өрісі мен қиялы шарықтаған жас жеткіншектердің көп екені қуантты.
Байқаудың аудандық кезеңінде су-көлік саласындағы техникалық құрастыру бағыты бойынша жаз мезгілінде, суға шомылу маусымында өзен-көлдерде суға кеткендерді жылдам құтқару мақсатында ойлап тапқан «Құтқарушы катер» жұмысы жоғары бағаланып, облыста да топ жарды.
Аронның жетекшісі, технология пәні мұғалімі Искаков Нұрлыбектің де оқушының шығармашылық қабілетін шыңдауына қосқан үлесі де айтарлықтай еңбек екені анық.
Тұлғаның шығармашылық құзіреттілігін арттыру, талантты балаларды анықтау, қолдау көрсету мақсатында дәстүрлі ұйымдастырылып отырған байқаудың маңыздылығы да ерекше.
Мейраш АЛЖАНОВА,
директордың бейіндік жұмыс жөніндегі орынбасары,
Түркістан облысы
