Шымкент қаласының әкімі Мұрат Дүйсенбекұлы «Қазақ радиосы» мен «Шалқарды» тыңдайды екен. «Радио – идеологияның маңызды құралы. Мыңдаған тұрғындар жолда жүріп радио жаңалықтарын тыңдайды. Халыққа дұрыс ақпарат жеткізуде, тұрғындардың сұраныстарын білдіруде және азаматтық қоғаммен байланысты жаңа деңгейге көтеруде радио қызметкерлерінің үлесі жоғары», – дейді Мұрат Әйтенов.
Өздеріңізге белгілі, Мемлекет басшысы Қасым-Жомарт Кемелұлының ұсынысымен ҚР Үкіметінің Қаулысына сәйкес 1 қазан – Радио қызметкерлері күні болып бекітілді. Елімізде алғаш рет тойланып отырған жаңа мерекені Шымкент қаласының әкімі «Шалқар» радиосының бір топ қызметкерлерін мегаполиске арнайы шақырып, құрмет көрсетумен атап өтті. Атап айтқанда мерекелік жиынға «Шалқар» радиосының бұрынғы бас-редакторы, ҚР Еңбек сіңірген қайраткері Көпен Әмірбек, «Қазақ радиосының» бұрынғы Бас директоры, ҚР Еңбек сіңірген қайраткері Махат Кәбірұлы, «Шалқар» радиосының директоры Болатбек Төлепберген, «Қазақстан» ұлттық арнасының тележүргізушісі Ләйлә Сұлтанқызы, «Үздік радиожурналист» сыйлығының иегері, қазіргі «Қазақстан КВН Одағының» Президенті Есентүгел Елеукен, тележүргізуші Асхат Садырбай қатысты. Қала әкімі радио қызметкерлерін мерекелерімен құттықтап, ізгі тілегін жеткізді. Қонақтарға Шымкенттің символына айналған қызғалдақтың тұқымын сыйға тартты.
Тәуелсіздіктің алғашқы жылдарында елімізде тек екі радио болса, қазір 79 радиостанция бар. Ал республиканың үшінші мегаполисінде 2 радиостанция жұмыс істейді. Оның ішінде 100 жылдық тарихы бар «Қазақ радиосының» филиалы қызмет атқарады. Республикалық радионың трансляциясы Шымкент қаласында 1929 жылдан бастап жүргізілсе, 1932 жылы радиохабарлар жүйелі түрде таратыла бастады. «Қазақ радиосының» 100 жылдық мерейтойына орай Шымкенттің Қаратау ауданындағы орталық бір көшеге «Қазақ радиосы» атауы берілген болатын.
