– Шағангүл Алдамжарқызы, Алаш-тың тұңғыш білім ордасының айтулы күні жақындап қалды. Әңгімемізді мерейтойлық іс-шараларға арналған жоспарыңызбен танысудан бастасақ.
– Бұл мерейтой – бірнеше ұрпақ үшін зор және маңызды оқиға. Енді еліміздегі ең байырғы білім ордасының 120 жылдық мерейтойы туралы айтатын болсақ, оның өту деңгейі мен жүзеге асырылу ауқымы қаншалықты екенін біз сезіп отырмыз. Педагогикалық колледждің шежірелі тарихын атақты тұлғалардың көптеген буындары, оқу орнын бітірген ұстаздар мен студенттер жазып жатыр. Уақыт адамға бағынышты емес, керісінше ол біздің тағдырымызға бағыт беріп, дамудың әртүрлі траекториясын белгілеп береді.
Тәуелсіз Қазақстанның тұңғыш мамандандырылған оқу орны – Семей мұғалімдер семинариясында Алаш қайраткерлері: Мұздыбаев Құрманбай, Әбікей Сәтбаев, Барлыбаев Ахметолла, Хасенов Әбіш, Әлімбеков Имамағзам, Сапақов Рахымбай, ағайынды Биахмет және Жанахмет Сәрсеновтер, Шантин Мұстафа, Қазы Нурмұхамедов, Ахметбек Шикібаев білім алған. Қазақ зиялыларының көрнекті өкілі Нұрғали Құлжанов қазақ тілінен сабақ берген тұңғыш ұстаз болған.
Семей қазақ педагогикалық техникумында Әлімхан Ермеков, Тайыр Жомартбаев, Халел Ғаббасов, Сейітбаттал Мұстафин, Мәннан Тұрғанбаев, Мұстақым Малдыбаевтар сияқты Алаш қайраткерлері, ұлт зиялылары сабақ берген. Педтехникумда ұстаз әрі ақын Ахат Шәкәрімұлы Құдайбергенов, Ішкі істер министрі Шырақбек Қабылбаев, Білім министрі Сембаев Әбдіхамит Ібінияұлы оқыған.
Жүсіпбек Аймауытов, Мұхтар Әуезов, Қаныш Сәтбаев, Әлкей Марғұлан, Шәкен Айманов сынды көрнекті тұлғалардың ұлттық мүдделерінің қалыптасуы республикамыздың тұңғыш оқу орны – Алаштың білім ордасынан бастау алады. Одан кейінгі жылдары бұл білім ордасы тәуелсіз еліміздің білім саласында қажырлы еңбек етіп жүрген жүздеген, мыңдаған педагог мамандарды даярлап шығарды.
Алдағы іс-шараның маңыздылығына байланысты мен Білім және ғылым министрлігінде қабылдауда болдым, мерейтойлық іс-шаралардың жоспары Қазақстан Республикасының Білім және ғылым министрі Ғани Бектайұлы Бейсембаевпен келісілді. Алдағы мерейтойдың мазмұнына көп көңіл бөліп отырмыз. Бұл үлкен іс-шараның бірі – халықаралық тұрғыда өтетін «М.О.Әуезов атындағы педагогикалық колледжі – кәсіби маман даярлаудағы ерекше орта» тақырыбындағы семинар-практикум.
Ресей Федерациясынан әріптестерімізді қонаққа шақырамыз, Ресей Федерациясының Алтай өлкесінің педагогикалық қоғамдастығының өкілдері, Томск педагогикалық университетінің тарих ғылымдарының докторы, Ресей Федерациясының Ғылыми-зерттеу институтының тарих ғылыми-білім беру орталығының (TSPU) директоры, профессор Марина Петровна Войтеховская шақырылады. Біз бұл кісіге ынтымақтастықта қызмет жасап отырғанымызға және мұрағаттық құжаттарды қамтамасыз етудегі көмегі үшін шексіз алғысымызды білдіреміз. Мерейтойымызды 2024 жылдың 27-28 қыркүйегі аралығында өткіземіз.
– Президенттің жыл сайынғы Қазақстан халқына Жолдауы туралы айтып өтсеңіз.
– Жыл сайын асыға күтетін Президентіміздің жаңа 2024-2025 оқу жылының басталуымен тұспа-тұс келген Жолдауын еліміздің әрбір азаматы ерекше күтті. Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауын жариялаған Парламент палаталарының бірлескен отырысында мен Абай облысы делегациясының атынан қатысу құрметіне ие болдым. Мемлекет басшысының Жолдауы еліміздің алдағы даму жолы мен ертеңгі күнгі бетбұрысты айқындап берді. Бұл Жолдау – еліміздің барлық бағыттар бойынша дамуы және тағдыры үшін аса маңызды Жолдау. Қазақ елінің әрбір азаматының көкейтесті мәселелерін шешуге арналған жаңа Жолдау еліміздің дамуында, халқымыздың өмірінде көптеген жаңа, жағымды бетбұрыстар болатынын көрсетті.
Мемлекет басшысының әлеуметтік салаға, әсіресе, балаларды қорғауға ерекше көңіл бөлінетінін атап өткеніне назарларыңызды аударғым келеді. Ұлттық қордан балалар шотына ақша аударуға қатысты заңның қабылдануына байланысты балаларды құмар ойындарға тартқан адамдар әкімшілік заңмен жазаланады, кәмелетке толмаған балаларға зорлық-зомбылық көрсеткені үшін жаза күшейеді, балалардың қауіпсіздігін қамтамасыз ету үшін, әйелдер мен балаларға көрсетілетін зомбылықтардың алдын алу мақсатында жобаланған заң қабылданады. Сондай-ақ, Президент қазір көптеген азаматтардың бірнеше несиелері бар екенін, бұл өте өзекті мәселе және бұл қоғамдық қауіпке айналып отырғанын атап өтті. Бұл бағытта арнайы заңдар қабылданып, халықтың әл-ауқатын арттыру мақсатында көптеген басқа да шаралар қолға алынғанын айтты.
Президенттің көздеген басты мақсаты – азаматтардың табысын арттырып, осы жолдағы әділетті Қазақстанды құру. Менің ойымша, бұл өте дұрыс, өйткені бізде бұл мәселелерді шешу үшін барлық мүмкіндіктер бар.
Мемлекет басшысы бірлік бар жерде тірлік барын атап өтіп, Жолдауының түйіні ретінде ел азаматтарын еліне адал қызмет етуге, абыройлы қызмет атқаруға, терең білім алып, талмай еңбек етуге шақырды.
Біздің әрбір бастамамыз, әрбір ісіміз еліміздің дамуына үлес қосуы керек. Ал туған жерін, Отанын сүйетін әрбір азамат бұл айтылғандармен келіседі деп ойлаймын.
– Өзіңіз туралы, колледж туралы кеңірек айтсаңыз, қандай педагогикалық мамандықтар бойынша кадрлар дайындайсыздар?
– 2010 жылы М.О.Әуезов атындағы педагогикалық колледж директоры қызметіне тағайындалдым. Алғашқы екі жылда колледждің оқу-материалдық базасын реформалауға баса назар аударылды. 1903 жылы салынған оқу ғимаратын жүз жылдан астам уақыт бойы жүргізілмеген күрделі жөндеуден өткізуге қаржылай қаражат бөлінуіне көп күш жұмсалды. Колледж жатақханасына қырық жылдан кейін күрделі жөндеу жұмыстары жүргізіліп, жатақхана аумағы абаттандырылды. Колледж тарихында тұңғыш рет атаулы оқу кабинеттері ашылды. 2013, 2018 жылдары білім ордасының 110 және 115 жылдығына орай өткізілген мерекелік іс-шаралар жоғары деңгейде өтті. Білім ошағының құрылған кезінен алғаш рет колледж тарихын қамтитын «Алаштың білім ордасы» атты екі кітап жарық көрді. Оқу орнының 120 жылдық мерейтойында колледж аумағында салынған үлкен концерт залының ашылу салтанаты болады, осы ресми датаға оқу орнының тарихынан сыр шертетін үшінші кітап баспаға дайындалып жатыр.
Өткен оқу жылында Мемлекет басшысы Қ.К.Тоқаевтың Абай облысына жұмыс сапарымен келу барысында М.Әуезов атындағы педагогикалық колледжінде болғанын мақтанышпен атап өткім келеді. Президент білім ордасының тарихы мен жетістіктеріне арналған көрмені аралап көрді, сосын ұстаздар және білім алушылармен сұхбаттасты.
Бүгінгі таңда колледж жұмысында білім саласы үшін сұранысқа ие кадрларды дайындауға басты басымдық беріп отырмыз. Бүгінде біз «Мектепке дейінгі тәрбие мен оқыту», «Бастауыш білім беру педагогикасы мен әдістемесі», «Негізгі орта білім берудегі тіл мен әдебиетті оқытудың педагогикасы мен әдістемесі», «Көркем еңбек», «Дене тәрбиесі және спорт» мамандықтары бойынша кадрларды дайындаймыз.
Егер сіз колледждің жарқын болашағын қалай көргіңіз келеді деп сұрасаңыз, былай жауап берер едім: оқытудың әртүрлі формаларымен жұмыс жасайтын заманауи оқу процесімен, жоғары ақпараттық ресурспен қамтылған, әркімге қолжетімді материалдық ресурстарға бай білім ошағы көз алдыма келеді.
Және өте маңыздысы өзіндік дәстүрлерге негізделген колледжді елестетем. Бар күш-қуатымды, ақыл-парасатымды, білім-білігімді бізге аманат қылып қалдырған мұраның сақталуына, көбеюіне жұмсаймын.
