Шығыс Қазақстан облысында бағаны орынсыз қымбаттатып жіберген саудагерлерге айыппұл салынып жатыр. Наурыз айының орта шенінен бастап елде сауда саласындағы құқық бұзушылықтар үшін жазаны қатайтатын түзетулер күшіне енген болатын. Сол уақыттан бері Шығыс Қазақстанда әлеуметтік маңызы бар өнімдерді қымбатқа сатқан кәсіпкерлерге бақылау күшейтілді. Белгілі болғандай, өңірде картоп, қырыққабат, ет бағасы қымбаттаған. ШҚО Сауда және тұтынушылардың құқықтарын қорғау басқармасының мәліметінше, бағаны бақылау үшін өңірлік комиссия құрылып, жұмыс істеп жатыр. Комиссия қорытындысы бойынша жыл басынан бері 82 заңбұзушылық тіркеліп, кәсіпкерлерге айыппұл салынған. Заң бойынша кәсіп иесі көтерме сатушының немесе өндірушіден сатып алған тауардың бағасына 15 пайыздан асырмай үстемеақы белгілеуі керек.
Гауһар Тұсынқожа
