20 қараша күні Қызылорда қаласында ҚР Президенті жанындағы «Орталық коммуникациялар қызметі» РММ Көшпелі баспасөз конференциясы болып өтті. Спикер Қызылорда облысының әкімі Нұрлыбек Нәлібаев Қызылорда облысының әлеуметтік-экономикалық дамуы туралы баяндама жасады. Нұрлыбек Мәшбекұлы ең алдымен Сыр өңірінде экономикалық дамудың макрокөрсеткіштері бойынша оң динамика қалыптасып отырғандығын айтып, нақты деректерді келтіре кетті.
– Бүгінгі күні Президентіміздің, Үкіметтің ерекше қолдауының арқасында облысымыздың бюджеті 744 млрд теңгеден асты. Осыдан екі жыл бұрын 364 млрд теңге болатын. Өсім 204,4 пайызды құрады. Бюджетіміздің 55,4 пайызы әлеуметтік салаға бағытталған. Облыстың даму бюджеті соңғы 2 жылда 3,6 есе артты, – деді аймақ басшысы.
Бұдан ары қарай әлеуметтік-экономикалық саланың жалпы жағдайына тоқталып өткен өңір басшысы Қызылорда облысындағы экологиялық апат аймағына айналып кеткен Арал шөлінде жүргізіліп жатқан жобалар мен болашақ жоспарларға назар аударды.
Қызылорда облысының әлеуметтік- экономикалық дамуы туралы баяндамадан түйгендеріміз бен аймақ жұртын алаңдатып жүрген кейбір мәселелердің жауабы туралы толық ақпаратты газетіміздің алдағы нөмірінен оқи аласыздар.
