Жуырда Талдықорған қаласында жастар мен жасөспірімдер арасында грек-рим, еркін күрес және әйелдер күресінен өткен ел чемпионаты өз мәресіне жетті. Бұл жарысқа Махамбет Дүйсенбаев басқаратын олимпиада жеткіншектерін даярлау орталығының спортшылары да қатысып, лайықты өнер көрсетті. Осылайша, жамбылдық жастар жарқын жеңістерімен жерлестерін қуанта білді. Атап айтқанда, 62 килограмм дәрежесінде Мәрлен Мейірбек чемпион атанса, 87 келі салмақта белдескен Нұрасыл Аманалы барлық қарсыластарын қапыда қалдырды.
Бұл сында Ерасыл Балғабайдың (41кг) бабы келіскенімен, бағы жанбады. Олай дейтініміз, жас спортшы ақтық сынға дейін сүрінбей келіп, финалда ғана қарсыласына жол берді. Осылайша, Ерасыл балуан алтынға бергісіз күміс жүлдеге қол жеткізді. Ал Юсиф Ашпаров (63кг) пен Төлеген Әмірханов (67кг) және Нұрасыл Қалмаханбетов (82кг) қола жүлдені қанағат тұтты. «Ел чемпионатына барлық өңірлердің спортшылары тыңғылықты дайындалатыны анық. Ешкім жеңісті қолдан бергісі келмейді. Өз кезегінде біз үміт артқан спортшыларымыз сенім үдесінен шықты. Қоржынымызда алтын да, күміс те, қола да бар. Әрине, аталған ел біріншілігінде кейбір шәкірттеріміз қателікке бой алдырды. Алдағы айтулы жарыстарда сол қателіктермен жұмыс істеп, жеңіс тұғырынан көрінуге күш саламыз, – деді жаттықтырушы Нұрлыбек Даулыбаев.
