Ежелгі тарихтың алтын парақтарын сақтап келе жатқан Тараз бүгінде жаңару кезеңін бастан өткеруде. Мыңжылдықтар тоғысында қалыптасқан шаһардың әрбір көшесінде, әрбір бұрышында өткеннің ізі сайрап тұрса да, бүгінгі күнгі құрылыс қарқыны мен сәулеттік өзгерістер оның келешегін айшықтап отыр.
Соңғы жылдары қалада қолға алынған ауқымды жобалар тек тұрғындардың өмір сапасын арттыруға емес, Тараздың мәртебесін аймақтың өркендеу орталығы ретінде биіктетуге бағытталған. Мәселен қала басшылығы бұқаралық спортты дамытуға айрықша назар аударуда. Бұл бағыттағы қарқынды жұмыстар Тараз тұрғындарының белсенді өмір салтын ұстануына жағдай жасап қана қоймай, жас ұрпақты салауаттылыққа тәрбиелеудің нақты қадамы.
Бүгінде шаһар аумағында 510 спорт нысаны жұмыс істейді. Оның ішінде 362-сі «Әулиеата» ауданында, 148-і «Жібек жолы» ауданында орналасқан. Биылдың өзінде қалада 11 жаңа футбол алаңшасын салу жоспарланып, соның бесеуі пайдалануға берілді. Ал қалған алты нысанның құрылысы қарқынды жүргізілуде. Сонымен қатар, Театральная №5 ауласынан бастап «Мыңбұлақ», «Қарасу», «Алатау», «Танты», «Шайқорық», «Қоңыртөбе», «Ақбұлым» секілді елді мекендер мен аулалардағы 12 спорт алаңшасы жаңғыртылды.
Әсіресе, тұрғындар асыға күтіп отырған «Ұлы Дала» шағынауданындағы дене шынықтыру-сауықтыру кешенінің құрылысы үлкен серпіліс. Ш.Жандарбекова көшесінде орналасқан 1 гектардан асатын жер телімінде бой көтеріп жатқан бұл кешен 2026 жылы ел игілігіне беріледі. Заманауи талаптарға сай салынған нысан балалар мен жастардың спортқа деген қызығушылығын арттырып, Тараздың спорттық әлеуетін жаңа деңгейге көтеретіні сөзсіз.
Жол – шаһардың шырайын айқындайтын басты көрсеткіштердің бірі. Соңғы үш жылда қалада ұзындығы 245,2 шақырымды құрайтын 365 көше асфальтталып, 79 шақырым болатын 180 көшеге шағал төселді. Мұндай көрсеткіштер Тараздың көлік инфрақұрылымының жыл сайын жетіліп келе жатқанын дәлелдейді. Ағымдағы жылы да бұл жұмыстар жүйелі жалғасуда. Жалпы ұзындығы 96,7 шақырымды құрайтын 108 көшеге асфальт төсеу, 34,6 шақырымдық 104 көшені шағалдандыру, сондай-ақ ұзындығы 10,25 шақырым болатын Рысбек батыр, Қойгелді және Асқаров көшелерін қайта жаңғырту жоспары жүзеге асуда. Бұған қоса, 83 мың шаршы метр аумақта ағымдағы жөндеу, 23 мың шаршы метрде жаңа жабынды төсеу жұмыстары жүргізілді.
Жол құрылысы тек сапалы төсемдермен шектелмейді. Қаладағы көлік ағымын реттеу үшін жаңа көпірлердің бой көтеруі – заман талабы. Қазіргі таңда «Казахдорстрой» ЖШС Абай даңғылында жол өтпе және жаяу жүргінші көпірін салып жатыр. Ал «ЖБИ-С» ЖШС «Қапал» каналы үстінен жаңа автомобиль көпірінің құрылысын қолға алған. Жол бөлігі 9 метрді, ал жаяу жүргінші жолы 1,5 метрді құрайтын бұл көпірлер тұрғындар үшін ыңғайлы әрі қауіпсіз қатынас тетігіне айналады.
Жолдар мен спорт нысандары ғана емес, Тараздың сәулеттік келбеті де күн санап жаңарып келеді. Қала орталығындағы көпқабатты үйлердің қасбеттері мен шатырларын жөндеу жұмыстары – шаһардың көркіне көрік қосқан қадам. Биылдың өзінде Абай даңғылы, Әйтеке би көшесі және Қазыбек би көшесі бойындағы 15 үй жаңғыртылуда.
Жұмыстар өндірістік кестеге сай жүргізіліп, мердігерлермен тиісті келісімдер жасалған. Бұл бастама алдағы жылы да жалғасын таппақ. 2026 жылы тағы 71 үйдің қасбеті мен шатырлары күрделі жөндеуден өтеді деп жоспарланған. Оның ішінде Қоңыртөбе елді мекеніндегі 12 тұрғын үй мен Ыбырайым Сүлейменов көшесіндегі 14 үй бар.
Тараз – тарихы тереңде жатқан көне шаһар. Оның әрбір көшесінде өткен дәуірлердің ізі сайрап жатса, бүгінгі инфрақұрылымдық даму сол тарихты лайықты жалғастырып тұр. Жаңарған жолдар, бой көтерген спорт кешендері, сәулетті тұрғын үйлер – барлығы да қала тұрғындарының игілігі үшін.
А. ЖАҚСЫЛЫҚ
