3 қараша күні Астана төрінде осымен үшінші рет өтіп жатқан «ТЕАТР АLL» III Халықаралық театр фестивалі аяқталды. Кезекті фестиваль биыл 60 жасқа толып отырған Абай атындағы мемлекеттік сыйлықтың лауреаты, Қазақстанның еңбек сіңірген қайраткері, жазушы-драматург Роза Мұқанованың шығармашылығымен таныстыру, халықаралық шығармашылық байланыстарды нығайту және театр өнеріне жаңа серпін беріп, өскелең ұрпаққа кеңінен насихаттау мақсатында ұйымдастырылып отыр. Бұл халықаралық фестивальға Әзербайжан, Қырғызстан және Қазақстанның үздік театр ұжымдары қатысып өнер көрсетті.
Роза Қажығалымқызы Қазақ Ұлттық Өнер университетінің профессоры ретінде аталмыш оқу орнында студенттерге дәріс оқиды. Биылғы «ТЕАТР АLL» фестивалінің драматург Роза Мұқанованың 60 жасқа толған мерейтойына арналып өткізіліп жатқандықтан, театр фестивалінің шеңберінде шеберлік сабақтары мен шығармашылық кездесулер де болып өтті. Қазақ ұлттық өнер университетінің ұйымдастыруымен «Театр өнері және өнертану» факультеті студенттерінің Р.Мұқанова драматургиясы бойынша қойған өзіндік жұмыстарының көрсетілімдері, сонымен бірге Ұлттық кітапханада отандық және шетелдік ғалымдардың қатысуымен халықаралық ғылыми-тәжірибелік конференция өтті.
– Театрлардың қатысуымен өткен фестивальдің басты мақсаты – түркі дүниесінің мәдени кеңістігіне есімі танымал жазушы-драматург Роза Мұқанованың драматургиясындағы рухани құндылықтарды өскелең ұрпаққа дәріптеу, театрлар арасындағы шығармашылық әріптестікті нығайту. Астана қаласының әкімдігі мен Мәдениет басқармасы, Музыкалық жас көрермен театрының ұйымдастыруымен, міне, осындай мақсаттарды арқау еткен, әр күн сайын көрермен назарына сағат 11.00-мен кешкі 19.00-де екі мәрте қойылымдар сахналанып, бір аптаға созылған Халықаралық театр фестивалі өз мәресіне жетті. Көрерменге шынайы театр атмосферасын сыйлаған фестивальдің жемісті де табысты бір аптасы еліміздің мәдени кеңістігінде ерекше оқиғаға айналды», – деді Музыкалық жас көрермен театрының директоры Асхат Маемиров.
Бізде жыл өткен сайын түркі дүниесінің рухани-мәдени байланыстары жанданып келе жатыр. Кезекті фестивальдің де бір мақсаты осындай ниетпен байланысты болғандығы қуантады. Биыл мамырда Баку қаласында ТҮРКСОЙ және Әзербайжан Мемлекеттік мәдениет және өнер университетінің ұйымдастыруымен «II түркі әлемі студенттерінің театр фестивалі» өткен еді.
Жүлдегерлерді марапаттау рәсімі елордадағы Қ.Қуанышбаев атындағы Қазақ ұлттық музыкалық драма театрында өтіп, жүлдегерлерге ақшалай сыйлықтар табыс етілді. Әрбір номинация бойынша жеңімпаздарды Қазақстан мен ТМД елдерінің театр сыншылары және драматургтерінен тұратын қазылар алқасы мен сарапшылар анықтады.
