Балалардың бос уақытын тиімді өткізуге, жаңа нәрселер үйренуге және қабілеттерін дамытуға көмектесетін тамаша орта ол үйірмелер. Олардың пайдасы өте көп. Білімін кеңейтеді. Үйірмелер арқылы бала мектеп бағдарламасынан тыс жаңа білім алады. Мысалы, робототехника, сурет, музыка немесе спорт үйірмелерінде бала жаңа дағдыларды меңгереді. Үйірмелерде бала нәтижеге жету үшін еңбектенуді, жауапкершілікті және уақытты тиімді пайдалануды үйренеді. Болашақ мамандық таңдауға көмектеседі. Биылғы халыққа Жолдауында Президент Қасым-Жомарт Тоқаев «Бұқаралық спортқа, дене тәрбиесіне және балаларға басымдық беру керек. Әр облыста, ірі аудан орталықтарында спорт үйірмелерін ашу қажет. «Балалар үйірмесі» қызметін қайта қалпына келтірген жөн. Онда жастарымыз қолөнердің және шығармашылықтың бастапқы негіздерімен танысар еді. Балалар үшін қатерлі бүгінгідей аумалы-төкпелі заманда олардың күш-жігері мен қызығушылығын дұрыс арнаға бағыттау аса маңызды» деп өскелең ұрпақтың шығармашылық әлеуетіне басты назар аударған болатын. Әртүрлі үйірмелерге қатысып жүрген бала өзіне ұнайтын істі табуы мүмкін. Бұл болашақ мамандығын таңдауда үлкен рөл атқарады. Үйірмелер баланы еңбекқор, шығармашыл және мақсатқа ұмтылатын тұлға етіп тәрбиелейді.
Шығармашылық үйірмелер
Шығармашылықпен айналысу баланың эстетикалық талғамын дамытып қана қоймай, қиялын ұштайды, эмоциялық интеллектін күшейтеді.
Сурет және кескіндеме үйірмелері
Бұл үйірмелер баланың қол моторикасын, түс сезіну қабілетін және көркемдік талғамын дамытады. Бейнелеу өнері арқылы бала өз ойын еркін жеткізуді үйренеді.
Қолөнер және сәндік-қолданбалы өнер
Ою-өрнек жасау, кесте тігу, мүсіндеу, тоқу секілді өнер түрлеріне баулитын үйірмелер балаға шыдамдылық пен ұқыптылықты үйретеді.
Музыка және вокал
Музыкалық қабілетті дамытуға арналған үйірмелер баланың есту, ырғақты сезіну қабілеттерін жетілдіреді. Музыкалық аспапта ойнау зейін қоюға, есте сақтау қабілетін жақсартуға көмектеседі.
Театр және сахналық өнер
Актерлік шеберлік пен шешендік өнерге бағытталған үйірмелер баланы еркіндікке, сенімді сөйлеуге және эмоциясын басқаруға үйретеді.
Ғылыми және интеллектуалды үйірмелер
Кейбір балалар шығармашылықтан гөрі ғылымға, математикаға немесе техникалық салаларға көбірек қызығады. Оларға арналған интеллектуалды үйірмелер:
Робототехника және бағдарламалау
Бүгінде ІТ саласы қарқынды дамып келе жатқандықтан, балаларға арналған бағдарламалау курстары мен робототехника үйірмелері өте танымал. Бұл үйірмелер логикалық ойлауды дамытады, инженерлік қабілеттерді қалыптастырады.
Математика және логика
Бұл секциялар логикалық ойлауды жақсартып, есеп шығару қабілетін дамытады. Балалар олимпиадаларға дайындалып, күрделі есептерді шешу арқылы аналитикалық ойлауды меңгереді.
Шет тілдері
Ағылшын, қытай, француз сияқты тілдерді үйрену баланың болашақ мансабы үшін үлкен артықшылық болады. Оқу мен сөйлеу дағдыларын дамытуға көмектеседі.
Жаратылыстану және зерттеу үйірмелері
Бұл үйірмелерде балалар химия, физика, биология сияқты ғылымдарды зерттейді. Эксперименттер арқылы ғылыми танымын арттырады.
Спорттық секциялар
Спорт – баланың физикалық дамуы мен тәртібін қалыптастыратын маңызды сала.
Жекпе-жек өнері
Таэквондо, каратэ, дзюдо, бокс секілді спорт түрлері баланы төзімділікке, өзін-өзі қорғауға және тәртіпке үйретеді.
Командалық ойындар
Футбол, баскетбол, волейбол сынды спорттар балаға көшбасшылық қасиеттерін дамытуға, ұжымда жұмыс істеуге көмектеседі.
Жүзу
Жүзу бұлшықеттерді дамытып қана қоймай, омыртқаға түсетін салмақты азайтады. Сондай-ақ, төзімділік пен тыныс алу жүйесін жақсартады.
Гимнастика және би
Гимнастика мен би дене сымбатын қалыптастырады, икемділікті арттырады. Балаларға арналған классикалық, заманауи және ұлттық билерді үйрететін секциялар да кеңінен таралған.
Психологиялық және әлеуметтік дамуға арналған үйірмелер
Кейбір үйірмелер баланың тұлғалық дамуына, эмоциялық интеллектінің қалыптасуына бағытталған.
Лидерлік және өзін-өзі дамыту курстары
Бұл сабақтар баланы сенімділікке, шешім қабылдауға, дұрыс қарым-қатынас орнатуға үйретеді.
Қазақстанда балаларға арналған үйірмелер жүйесі жақсы дамыған. 2029 жылға дейін балалар мен жасөспірімдер туризмін дамыту бойынша Жол картасы әзірленген. Онда жазғы демалысты, бос уақытты ұйымдастыру, спорт секциялары арқылы балаларды қамту мәселелері қарастырылған. Еліміз бойынша ерекше қажеттілігі бар балалар үшін тегін спорт үйірмелері де ашылған. «Бейімделген спорт», тірек-қимыл аппараты бұзылған балаларға арналған футбол секциясы және т.б. Балалардың бос уақытын тиімді өткізу, денежүзілік және ой қабілетін дамыту, шығармашылыққа жол ашу мақсатында үйірмелер аса маңызды. Жалпы өңірде баланы тәрбиелеудің басты құралы саналатын үйірмелер жұмысы бір ізге түскен. Бұл бағытта түрлі жұмыстар атқарылып жатыр. Мақсаттар жүзеге асса балалардың көкжиегі кеңейіп, мүмкіндіктер әлеуеті артатын болады.
