Ұлттық Құрылтайда Мемлекет басшысы: «Біз «тарихи жарақат алған» ұлт психологиясынан біржола арылуымыз керек», – деді. Бұл түсінгенге мағынасы терең, астары қалың сөз! Өзім қатты разы болдым! Ымды түсінбеген дымды түсінбейді. Бұдан асырып не демек!
Дипломат, саясаткер, мемлекет басқарып отырған адам үнемі ишарамен, астармен, пәлсапамен толғайды. Аңыратып айтып тастамайды! Бұл сөзді мен өзімше тәпсірледім. Біздің «тарихи жарақат алған» ұлт екеніміз баршаға аян.
Оған патшалық Ресейдің озбырлығы мен кешегі Кеңес үкіметінің жасаған зұлымдығы нақты дәлел!
Бүгінгі Ресей де бізге қатты жаны ашып отырған жоқ! Өз ағайыны Украинаны аямаған жұрт, ешкімді маңдайынан сипай қоймас!
Бір Аллаға аян, Президентіміз ұлтты сақтап қалу үшін, Мұқағали ақынның өлеңін өзгертіңкіреп жеткізсем:
«Біреулермен жалғастырып жең ұшын,
Жасап жүрсем жаным сүймес келісім,
Барлығы да қайран халқым, сен үшін», – деп жүргені анық!
Дана қазақ «жындымен жынды болма» дейді! Ең басты ұран ел тыныштығы екенін ол біледі! Мемлекет басшысы «Біз «тарихи жарақат алған» ұлт психологиясынан біржола арылуымыз керек» дегенде, қазақ ұлтын оянуға шақырып отыр. Еңсеңді тікте, ғылым мен білімге ұмтыл, иманыңды жоғалтпа! Тарихыңды әспетте! Дау-дамайдан қаш, барыңды қадірле, өткеніңді ұмытпа!
Құлдық психологиядан арыл! Ана тіліңде сөйле! Ұлт болып ұйыс! «Тарихи жарақатыңнан» сауық! Тұтастығыңды сақта! Ұрпақ тәрбиесіне көңіл бөл! Жоғыңды түгенде! Тірі екенімізді, ірі екенімізді көрсетейік! Сабырлы болайық!
Сонда ғана халқым, біз жеңіске жетеміз деген емеурін жатыр Президент сөзінде.
«Бүлік шыққан елден береке мен ынтымақ қашады». «Бір күн ұрыс болған үйден қырық күн береке кетеді» дейді данышпан жұртымыз.
Бірпалаталы Құрылтай кәсіби Парламент құруға жол ашпақ
Ұлттық Құрылтай өз жұмысын тоқтатқаны белгілі. Көп жұмыс істелді. Алдыңғы уақытта екіпалаталы парламент бірпалаталы Құрылтайға айналады.
Мемлекеттік кеңесші – Конституциялық комиссия төрағасының орынбасары Ерлан Қарин Конституциялық реформа жөніндегі комиссияның алғашқы отырысында Құрылтайдың заң қабылдау үдерісі қандай форматта ұйымдастырылатынын жеткізді.
Бірпалаталы Құрылтай заң жобаларын 3 оқылымда қарайды.
Ол жиында Жұмыс тобының конституциялық реформаға қатысты ұсынған жаңашылдықтарын тарқата айтты.
