Қазақстан Республикасының ауқымды «Таза Қазақстан» республикалық акциясы аясында Тараз қаласы, «Жібек жолы» ауданында игілікті іс-шара – «Жасыл мектеп» атты экологиялық шара ұйымдастырылып, табысты өтті. Бұл бастама жас ұрпақтың экологиялық мәдениетін арттыруға және туған өлке табиғатын аялауға бағытталған маңызды қадам болды.
Іс-шараға Тараз қаласындағы №62 орта мектептің оқушылары, сондай-ақ аталған аудандағы өзге де оқу орындарының білім алушылары белсене қатысты. Оқушылар өз мектептерінің аумағына түрлі ағаш көшеттерін отырғызу жұмыстарын жүргізді. Осы күні жалпы саны 100 дана жеміс ағашы және жапырақты, қылқан жапырақты сәндік ағаштар егілді. Бұл – мектеп ауласын көгалдандырып қана қоймай, ауданның экологиялық ахуалын жақсартуға қосқан нақты үлес.
Шараның басты әрі есте қаларлық ерекшелігі – әрбір оқушының өз есімімен белгіленген жеке ағаш отырғызуы. Бұл тәсіл арқылы әрбір білім алушы мектеп аумағын көркейту мен табиғатты қорғаудағы жеке жауапкершілігін сезініп, ортақ іске қосқан үлесін нақты сезінуге мүмкіндік алды. Бұл олардың ағаштарды күтіп-баптауға деген ынтасын арттырары сөзсіз.
Экологиялық акция «Жібек жолы» ауданы әкімдігінің, қалалық білім бөлімінің және «Baytaq» жасылдар партиясы, сондай-ақ белсенді қоғам өкілдерінің жан-жақты қолдауымен өткізілді. Шараның басты мақсаты – әрбір оқушының өз мектебінің абаттандырылуы мен көгалдандырылуына үлес қосуына мүмкіндік беру арқылы олардың табиғатқа деген ортақ жауапкершілікті сезінуін қалыптастыру.
Бұл маңызды бастама – «Жібек жолы» ауданы аумағын жүйелі түрде көгалдандыру және жас ұрпақтың экологиялық мәдениетін арттыру бағытындағы ұзақ мерзімді жұмыстардың бір бөлігі болып табылады. Осылайша, бүгінгі оқушылар ертеңгі жасыл елдің тірегі болатынына сенім артылады.
А.ЖАҚСЫЛЫҚ,
Жамбыл облысы
