Бұл жаңалық құлағыңызға тосын естілер. Алайда тағдыр тезіне ұшырап, бостандығы шектелген адамдарды дұрыс жолға бағыттап, өмірде жаза басқанын ұғындыру үшін жасалып жатқан жұмыстардың нәтижесі бұл.
Мұндай ақпаратпен БҚО Қылмыстық-атқару жүйесі департаментінің баспасөз қызметі бөлісті. Атап айтсақ, Батыс Қазақстан облысына қарасты Тасқала ауданының әкімі аудандық пробация қызметінің есебінде тұрған шартты түрде сотталған Н. есімді азаматты «алғыс хатпен»марапаттады. Бұл марапат сотталушыға Тасқала ауданының аумағындағы көктемгі су тасқынының алдын алу және болдырмауға қарсы жүргізілген іс-шараларға белсенді атсалысып, өз үлесін қосқаны үшін берілді.
«Аудан тұрғындары қырағылық пен қайсарлық танытып, алдыңғы қатардан көрініп, ауданымызға төнген табиғи апаттың алдын алуға сақадай сай болған Сіздей азаматты мақтан тұтады» делінген аудан әкімінің алғыс хатында.
Аудандық пробация қызметінің инспекторлары алдағы уақытта есепте тұрған сотталғандарды түзу жолға бағыттау мақсатындағы профилактикалық жұмыстарды белсенді түрде жалғастыратын болады.
