Жуырда Абай атындағы Атырау облыстық оқушылар орталығында «Бақытты балалық шақ – жайдарлы жаз» және «Жайдарлы жаз – 2026» бейіндік лагерьлерінің ашылу салтанаты өтті.
Облыстық білім беру басқармасы басшысының орынбасары Лаура Меңдіғалиеваның айтуынша, биылғы лагерь алты кезең бойынша жұмыс істеп, 2400-ге жуық баланы қабылдайды.
– Бүгінде лагерьге Атырау қаласымен қатар, облыстың аудан-қалаларынан 400-ге жуық бала ата-аналарының келісімімен қатысып отыр. Лагерь балалардың жазғы демалысын тиімді әрі мазмұнды ұйымдастыруға бағытталған, – деді ол.
Биыл өңірдегі жазғы сауықтыру және демалыс шаралары 154 300 баланың 95 пайызын қамтиды. Осы мақсатта мектептер мен қосымша білім беру ұйымдарының жанынан бейіндік және киіз үй-палаталық лагерьлер ұйымдастырылады.
Салтанатты шара барысында орталық тәрбиеленушілері концерттік бағдарлама ұсынып, өз өнерлерін көрсетті.
