Қазақ қоғамындағы ең өзекті проблеманың біріне айналған «Әйелдердің зейнет жасын өсіру» болатын. Бұл жайында өткен жиындар мен кеңестерде шек жоқ. Тіпті Парламентте де сөз болған. Қызметте жүрген небір апалар мен әжелер бұл мәселені қолдап, Еуропалық стандартқа балап «қолдау» білдірген. Күйінген халық «Айналайындар-ау, Еуропа қайда, біз қайда? Жетпіске дейін күтіммен жүрген сендер мен ауылдың әйелдері тең бе?» деп шу да шыққан. Бұл мәселе ушығып тұр еді, күні кеше Президент Тоқаев халыққа жолдауында бұл мәселеге нүкте қойды. Сол-ақ екен әйелдердің зейнет жасын көтеруге мораторий жарияланатыны айтыла бастады. Яғни әйелдердің зейнетке шығу жасын арттыруды 2028 жылға дейін тоқтату үшін арнайы заң қабылданбақ.
ҚР Ұлттық экономика министрі Әлібек Қуантыров Үкімет отырысында осылай деп мәлім етті. «Бұдан басқа, алпыс бір жасты белгілей отырып, әйелдердің зейнет жасын 2028 жылға дейін арттыруға мораторий енгізуді және 2023 жылғы бірінші қаңтардан бастап бала күтімі бойынша төлем тағайындау кезеңінің ұзақтығын бір жарым жасқа дейін ұлғайтуды көздейтін заңнамалық түзетулер қабылданады», – деді ведомство басшысы. Сондай-ақ, ол әлеуметтік сақтандыру жүйесіне қатысушылар үшін жұмысынан айырылған кездегі әлеуметтік төлемдердің мөлшері орташа айлық табыстың 45 пайызына дейін ұлғаятынын атап өтті. «2024 жылғы 1 қаңтардан бастап балалардың арнайы жинақтаушы шоттарына Ұлттық қордың жыл сайынғы инвестициялық кірісінің 50 процентін мерзімінен бұрын алу құқығынсыз, кейіннен оларды тұрғын үй сатып алуға және білім алуға пайдалану мүмкіндігімен аударуды көздейтін «Ұлттық қор – балаларға» жобасын іске қосу жоспарланған», – деді министр.
