Таяудағы ҚР Үкіметінің отырысында еліміздегі автожол саласын дамыту мәселесі қаралғаны белгілі. Өткен жылдың қорытындысы бойынша айтар болсақ, Абай облысында нормативтік жағдайдағы жолдардың үлесі 78,6%-ды құрады. Бұл туралы Абай облысының әкімі Нұрлан Ұранхаев баяндады.
«2023-2025 жылдарға арналған республикалық және облыстық бюджеттер арасындағы жалпы сипаттағы трансферттердің көлемі туралы» Қазақстан Республикасының Заңына сәйкес, 2024 жылға облыс үшін бюджет қаражатының ең төменгі көлемі бекітілді. Бұл қаражат облыстық және аудандық маңызы бар жолдарды күрделі және орташа жөндеуге бағытталған. Тағы 24 жобаны іске асыру жоспарға енген.
2024 жылы жергілікті маңызы бар 219 шақырым жолды жөндеу жұмыстарын жүргізу жоспарланып отыр. Оның 75 шақырымы облыстық маңызы бар жолдарға, ал 144 шақырымы аудандық маңызы бар жолдарға жатады. Облыста жыл сайын жол жөндеу жұмыстарымен қамту 220 шақырымнан асатынын айтып өткен жөн.
2022 жылы жалпы сипаттағы трансферттер есебінен 3,2 млрд теңге сомасына 175 шақырым жол жөнделді. Оның ішінде 42 шақырымы облыстық (1,1 млрд теңгеге) және 133 шақырымы аудандық маңызы бар жолдар (2,1 млрд теңгеге) бойынша игерілген. 2023 жылы 245 шақырым жол жөнделді, оның 107 шақырымы облыстық болса, 138 шақырымы аудандық жол.
Нақты дерекпен айтар болсақ, Абай облысындағы автомобиль жолдарының жалпы ұзындығы 4 656 шақырымға жетеді. Оның 1 593 шақырымы облыстық, ал 3 063 шақырымы аудандық маңызы бар жолдар есебіне енген.
Сәтжан ҚАСЫМЖАНҰЛЫ,
Абай облысы
