255 адам мемлекеттік тілді тегін оқып жатыр

«Тіл» оқу-әдістемелік орталығында стандартқа сәйкес 5 деңгей бойынша үш тілді тегін меңгеруге болады. Орталықта білім алушылардың ең жасы 18-де, ал үлкені 77 жаста. – Жыл басынан бері мекемелер мен жеке азаматтардың сұранысы бойынша 33 топ ашылды. Атап айтсақ, «Мемлекеттік тілді оқыту» курсына 18 топ, «Ағылшын тілін оқыту» курсына 13 топ, «Орыс тілін оқыту» курсына 2 топ ашылды. Қазір осы топтарға бөлінген 300-ден аса ересек тегін білім алып жатыр. Алдағы уақытқа тұрғындардың өтінішіне сәйкес, «Мемлекеттік тілді оқыту» және «Ағылшын тілін оқыту» курстарына жаңа топтар ашылады, – деді орталық басшысының міндетін атқарушы Лаура Газизова. Былтыр курсты 900 адам оқып шыққан болатын. Оның ішінде «Мемлекеттік тілді оқыту» курсына – 375, «Ағылшын тілін оқыту» курсына – 300, «Орыс тілін оқыту» курсына 30 және біліктілікті арттыру семинарына 195 азамат қатысты. Биыл 950 адамды оқыту жоспарланып отыр. Оның ішінде «Мемлекеттік тілді оқыту» курсына – 375, «Ағылшын тілін оқыту» курсына – 315, «Орыс тілін оқыту» курсына 30 және біліктілік арттыру семинарына 215 азамат қамтылады деп күтілуде.