Орал қаласында ағымдағы жылдың 11 шілдесі мен 2 қыркүйегі аралығында жеке тұрғын үй құрылысына арналған жер телімдерін беруге өтініштер қабылдануда.
Орал қалалық әкімдігінде ұйымдастырылған брифинг барысында қалалық жер қатынастары бөлімі басшысының орынбасары Мирас Мұхитов жер телімдері 900 адамға берілетінін айтып өтті.
– Орал қаласы әкімдігі 2017 жылы шаһар аумағындағы Круглоозерный кентінен жалпы көлемі 165 гектарды құрайтын жер учаскесін мемлекет меншігіне қайтарған болатын. Әкімдік тарапынан осы аумақты егжей-тегжейлі жоспарлау жобасы жасақталып, жер учаскелеріне бөлініп, оларға инженерлік желілер өткізілді. Бұл жерлер тұрғын үй құрылысына арналған жер телімдерінің кезегінде тұрған 900 адамға берілетін болады. Яғни 2002, 2003 жылдары, 2004 жылдың бірінші және екінші тоқсанында өтініш жазған азаматтар қамтылады. Олардың тізімі Орал қаласы әкімдігінің ресми сайтында жарияланды, – деді аталмыш бөлімнің өкілі.
Атап өткендей, жер телімдерін тізімде қамтылған тұрғындарға беруге өтініштер қабылдау 11 шілдеде басталды. Алдағы 2 қыркүйекке дейін жалғасатын бұл іс-шараның мерзімі ұзартылуы да мүмкін. Қолданыстағы заңға сәйкес, алдымен тізімдегі адамдардың мемлекеттен тегін жер учаскесін алған-алмағандығы жөнінде ақпараттар тексеріледі. Аталған ақпарат зерделеніп, мемлекеттен тегін жер берілмеген болса, одан әрі үлгі бойынша өтініш толтырылады. Барлық өтініштер ҚР Ауыл шаруашылығы министрлігінің 2020 жылғы 1 қазандағы бұйрығына сәйкес «Елдімекен шегіндегі объектілерді салу үшін» қағидасына сәйкес жүргізіледі.
– Бұл мемлекеттік қызмет жалпы 46 жұмыс күнін қамтиды. Бірінші кезең – 28 күн, яғни өтініш келіп түскеннен кейін Орал қаласының сәулет және қала құрылысы бөлімі жер учаскесін беру жөнінде жер таңдау актісін жасақтайды. Коммуналдық мекемелерге келісімге жібереді. Келісім алынғаннан кейін жер таңдау актісін бекітеді. Екінші кезең 18 күнді қамтиды. Бұл аралықта жасақталған, бекітілген жер таңдау актісіне сәйкес жер кадастрын жүргізетін мемлекеттік корпорация жер кадастрының жоспарын жасақтап, оны Орал қаласының жер қатынастары бөліміне жолдайды. Олар аталған кадастрлық жоспарды бекітіп, Орал қаласы әкімдігінің қаулы-жобасын дайындап, қол қойылады. Аталған қаулы негізінде жалға беру шарты жасалады. Жеке тұрғын үй құрылысына арналған жер телімдері жалға беру шартымен үш жылға беріледі. Жерді пайдаланушылар үш жыл ішінде үйін тұрғызып алғаннан кейін ол жерді жекеменшікке сұрауына болады. Сол кезде аталған жер телімі азаматтарға тегін беріледі, – деп түсіндірді бөлім басшысының орынбасары М.Мұхитов. Бұл жерлердің жеке тұрғын үй құрылысына ғана арналғанын баса айтқан баяндамашы үш жыл ішінде мақсатты түрде пайдаланылмаған жер телімі мемлекет меншігіне қайтарылып, кезекте тұрған келесі адамға берілетінін жеткізді. Сонымен қатар аталған кентте бой көтеретін тұрғын үйлердің сыртқы сұлбасының біркелкі болуы да назарға алынады.
Өтініштер қабылдау облыс орталығындағы «Жұмыспен қамту орталығында» жүргізілуде. Келушілерге «Халыққа қызмет көрсету орталығының» мамандары да сол ғимаратта қызмет көрсетеді. Күніне жиырма адамнан өтініш қабылдануда.
Жалпы Орал қаласында жеке тұрғын үй құрылысын жүргізуге арналған жер телімін сұрап 109 мыңнан астам адам өтініш жазған. Ал елімізде әрбір қазақстандық 10 сотық жерді тегін алуға құқылы екені белгілі.
