Халықтық коалицияның форумында Мемлекет басшысы Қасым-Жомарт Тоқаев: «Жақын арада мен сайлауалды тұғырнаманы ұсынамын, онда елді жан-жақты трансформациялау, азаматтардың әл-ауқатын арттыру жөніндегі іс-шаралар көрініс табады. Менің нық сенімім бойынша, біздің мемлекет өңірлік және жаһандық қауіпсіздікті қамтамасыз етуге бағытталған теңгерімді, көп бағытты, сындарлы сыртқы саясатты жүзеге асыруы тиіс. Қазақстан халықаралық қатынастардағы теңдік пен демократия қағидаттарын, халықаралық құқық пен БҰҰ Жарғысын ұдайы сақтауды жақтайды. БҰҰ-ның әмбебап және баламасыз халықаралық ұйым ретіндегі беделін нығайту үшін белсенді күш-жігер жұмсайды. Біз Тәуелсіз Мемлекеттер Достастығы, Шанхай Ынтымақтастық Ұйымы, Еуропадағы қауіпсіздік және ынтымақтастық ұйымы, түркі мемлекеттері ұйымы және басқа да халықаралық ұйымдармен ынтымақтасатын боламыз, сондай-ақ Азиядағы өзара іс-қимыл және сенім шаралары жөніндегі кеңестің әлеуетін нығайтамыз. Сайлауалды тұғырнамадағы бағыттарға келсем, біз үшін негізгі басым бағыт – халықтың әл-ауқатын арттыру. Бұл басымдық ешқашан өзгермейді. Ал біздің реформаларымыздың басты мақсаты – Әділетті Қазақстан құру. Көп нәрсе жасалды. Бірақ біз осынау қиын жолдың тек басында ғана тұрмыз. Алға қарай жылжу үшін біз өткеннен сабақ алып, болашақтың бейнесін нақты көруіміз керек. Меніңше, ұлтты ұйыстыратын жеті қағида бар. Оларды атап өтсем:
Бірінші. Тәуелсіздік бәрінен қымбат.
Екінші. Елдіктің негізі – жеріміздің тұтастығы.
Үшінші. Мемлекет мүддесі – қастерлі құндылық.
Төртінші. Рухани үндестік – бірліктің бастауы.
Бесінші. Заңдылық пен тәртіп – өркениетті ел болудың кепілі.
Алтыншы. Жасампаздық – жаңару мен жаңғыру жолы.
Жетінші. Достық пейіл, мейірімділік және жанашырлық – ең асыл қасиеттер», – деп мәлімдеді.
