6-8 маусым аралығында өткен тренинг барысында отандық және шетелдік дәрігерлер 12 ота жасаған. Нұр-Сұлтан қаласына алғаш рет келген әлемге әйгілі балалар ортопеді, профессор Марк Эйдельман №2 Көпбейінді қалалық балалар ауруханасы базасында балалар арасындағы туа біткен жамбас буынының шығуы бойынша шеберлік сағатын өткізді.
– Біздің бөлімшеде тірек-қимыл аппаратының туа біткен және жүре пайда болған патологиялары бар балалар ем алады. Біз жаңа туғаннан 18 жасқа дейінгі балаларды емдеумен айналысамыз. Тәжірибе алмасу бізге балалар травматологиясын үйлестіруге көмектеседі, – дейді №2 Көпбейінді қалалық балалар ауруханасының балалар ортопедиясы бөлімінің меңгерушісі Ағабек Чикинаев.
– Израильде мен мұндай жағдайлар бойынша оталар жасамаймын. Себебі біздің елде бұл сирек кездеседі. Шеберлік сағатында өз білімімді әріптестеріммен бөлісіп, шетелде қолданылатын технологияны көрсеткім келді, – деді профессор Марк Эйдельман.
Марк Эйдельман қазақстандық ата-аналарды ортопедтерге уақытылы жүгініп, олардың ұсыныстарын бұлжытпай орындауға шақырды. Медициналық білімді Самарқанд қаласындағы институтында алған Марк Эйдельман кейін келе «Рамбам» клиникасында және «Синай» американдық ауруханасында ортопедия бойынша маманданған. Қазіргі таңда Израильдегі «Technion» Израиль технологиялық университетінің профессоры болып жұмыс істейді. Профессор Эйдельман өз тәжірибесінде күрделі сынықтар мен сүйек деформацияларын емдеу үшін Taylor Spatial Frame (TSF) белсенді пайдаланады. Бұл сыртқы бекіткіш, екі немесе одан да көп алюминийден тұратын Стюарт платформасына негізделген алтыбұрышты басы бар құрылғы немесе көміртекті сақиналар қосылған тіректер. Ол қаңқаның туа біткен және жүре пайда болған деформациясын емдеудің барлық заманауи әдістерін қолданады.
