Қауіпсіздікті қадағалап, өңір тұрғындарын сақтыққа шақырып жүретін төтенше жағдай саласы қызметкерлерінің жұмысы қашан да қауырт. Батыс Қазақстан облыстық төтенше жағдай департаментінің бастығы Ернұр Өтегенов жуырда БАҚ өкілдерімен кездесіп, 2021 жылы атқарылған жұмыстар туралы баяндады.
Жедел жағдайлар туындаған кезде батыл қимылдайтын ТЖД-нің апаттық-құтқару қызметтері есептік кезеңде дабыл бойынша 2363 рет қызметке шыққан. Нәтижесінде 851 адам құтқарылып, 802 тұлға эвакуацияланған. Сонымен бірге 153 зардап шегушіге дәрігерге дейінгі медициналық көмек көрсетілген.
– Алдыңғы жылдың сәйкес кезеңімен салыстырғанда өрт саны 8%-ға, қаза болғандар саны 4-ке төмендеді, жарақат алғандар саны 36,6%-ға (7 адам) азайды. Ал табиғи жанудың саны – 35,5%-ға, табиғи өрттер саны 44,1%-ға азайды. Алайда орман өрттерінің 68,4%-ға өсуі байқалады. Бұл ретте осы өрттердің ауданы мен залалы алдыңғы жылғы көрсеткіштерден айтарлықтай төмен, – дейді департамент бастығы Ернұр Сапарұлы. Айтуынша, БҚО-да қазіргі уақытта 103 елді мекенді қызыл жалыннан қорғайтын 20 өрт сөндіру бекеті жұмыс жасайды.
Департамент бастығы өз баяндамасында мемлекеттік бақылаудағы нысандардың өртке қарсы қауіпсіздігін қадағалау іс-шараларынан да хабардар етті. Тілсіз жаудың алдын алу да – осы мекеменің құзырында болғандықтан, өткен жылы шаруашылық жүргізуші субъектілердің өртке қарсы жағдайына 1539 тексеру жүргізіліп, 6304 өрт қауіпсіздігі ережелерін бұзу оқиғалары анықталған.
Қазір – жылыту маусымының кезеңі. Осы уақытта да тұрғын үйлерде өрт қауіпсіздігін қадағалау жауапкершілігін күшейту талап етіледі. Департамент мамандары атап өткендей, 2021-2022 жылғы жылу беру кезеңінде БҚО-да 107 өрт тіркелген. Мұндай төтенше жағдай кезінде өрттен 1 адам қаза болса, 4 тұрғын зардап шеккен.
Төтеншеліктер маусымның қай кезеңінде болмасын, түрлі апаттардың алдын алу мақсатында рейдтік іс-шаралар ұйымдастырып, төтенше жағдайларды болдырмауға күш салады. Осындай ауқымды іс-шаралардың бірі – облыста көктемгі су тасқынының алдын алу шаралары. Биылғы жылға барлық қам-қарекет жасалып, дайындық жұмыстары жоспарлы жүргізілуде. Сонымен бірге төтенше жағдай саласының қызметкерлері қаһарлы қыста қар құрсауында қалғандарды құтқару, тұрғындармен түсінік жұмыстарын жүргізу, су айдындарындағы қауіпсіздікті қадағалау сынды жұмыстардың басы-қасында жүреді.
