Ақтөбе облысында егін егу жұмыстары 98 %-ға аяқталды. 7 маусым күні өткен аппарат жиынында облыс әкімі Оңдасын Оразалин өңірдегі егін егу науқанын барынша тездетуді тапсырды.
Биыл облыс бойынша 502 мың гектар жерге ауылшаруашылығы дақылдарын себу жоспарланып отыр. Ауа райы егін егу барысына айтарлықтай әсер етті. Мамыр айының II-III онкүндігінде облыс бойынша орташа есеппен 2,5 есеге дейін нормадан артық жауын-шашын түсіп, толассыз жауған жаңбырдың салдарынан егіс жұмыстарының қарқыны баяулады.
– Біздің егіс жұмыстарын аяқтауға әлі де уақытымыз бар. Егер тездетпесек, күзде жаңбыр ерте басталса, егін жинауда қиындықтар болуы мүмкін. Әр қожалықтағы егін егу барысын бақылаңыздар. Егін егу жұмыстары кешеуілдесе де, ылғал қоры бар, тұқыммен және жанар-жағармай материалдарымен қамтуда проблема болмайды – жақсы егін алуға мүмкіндік бар. Шабындықты да уақытылы ұйымдастыру керек, – деді өңір басшысы Оңдасын Оразалин.
Шаруашылық құрылымдары жұмыс қарқынын арттыра отырып, тәулігіне 32 мың гектар жерге дейін егу жұмыстарын жүргізіп жатыр. Нәтижесінде бүгінге дейін 492,0 мың гектар жерге дән себілді. Бұл – жоспарланған алаңның жалпы көлемінің 98 пайызы. Жалпы егіс жұмыстарының барысы бақылауға алынып, 10 маусымға дейін толық аяқталатын болады.
Ауылшаруашылығы құрылымдарын қолдау мақсатында өсімдік шаруашылығы бойынша жергілікті бюджеттен 1,3 миллиард теңгеге субсидия төлеу жұмыстары жүргізіліп жатыр. Қаражат тұқым, минералды тыңайтқыштар мен гербицидтер бағасын арзандатуға арналған.
