Қызылорда өңірінде өсірілетін негізгі дақыл – Сыр күрішінен, басқа да ауылшаруашылық дақылдарынан биыл да мол өнім алынды.
Осынау игілікті істе көш бастап келе жатқан Шиелі ауданында «Алтын күз – 2021» мерекесі өтіп, «қос тойың қатар болсын» деп қазақ айтпақшы, екі мәрте Социалистік Еңбек Ері Ыбырай Жақаевтың 130 жылдың мерейтойы бірге өткізілді. Осынау игілікті іс-шара «Жалпақ жұртқа аты мәлім Жақаев» атты республикалық ғылымдық-танымдық конференциядан басталды. Жарты ғасыр күріш өсірумен айналысқан даңғайыр диқан 1947 жылы әлемде бірінші болып гектарынан 171 центнер күріш дақылын алып, Социалистік Еңбек Ері атағына ие болды. Қарапайым күрішші өз бақытын осылай еңбектен тапқан еді. Ы.Жақаев бұл жетістіктерімен тоқтап қалған жоқ. Жоғарғы марапатқа екінші мәрте ие болып, көптеген ізбасарлар тәрбиеледі. «Жақаевшылар қозғалысы» елімізде кеңінен етек алды.
Конференцияда Ы.Жақаев атындағы Қазақ күріш шаруашылығы ғылыми-зерттеу институтының бас ғылыми қызметкері, ауылшаруашылығы ғылымдарының докторы, ауылшаруашылығы ғылымдар академиясының корреспондент мүшесі Қ.Бәкірұлы «Күріш сорттары және оның тұқым шаруашылығы», Қорқыт ата атындағы Қызылорда университетінің аға оқытушысы, ауылшаруашылық ғылымдарының докторы И.Таутенов «Күріш шаруашылығында минералдық тыңайтқыштарды қолданудың өзекті мәселелері», Қорқыт ата атындағы Қызылорда университетінің «Су шаруашылығы және жерге орналастыру» кафедрасының доценті С.Өмірзақов «Күріш дақылын өсіруде Жақаев атамыздың тәлімдері», Қазақ ұлттық аграрлық университетінің «Су ресурстары және мелиорация» кафедрасының профессоры, ҚР ҰҒА академигі А.Рау «Возделывание риса в Кызылординской области по технологии Ы.Жахаева» атты баяндама жасады.
Биыл Шиелі ауданы бойынша 30 189,5 мың гектар жерге ауылшаруашылығы дақылдарын, оның ішінде 12 039 гектар күріш екті. Су тапшылығына байланысты негізгі дақыл күріш көлемі өткен жылмен салыстырғанда 2 314 гектарға дейін азайтылып, орнына суды аз қажет ететін көкөніс, бақша дақылдары егілді.
Ермаханов Асхат басқаратын «Жем жомарт Д» ЖШС-і 300 гектар күріштің әр гектарынан 80 центнерден өнім алып, 2400 тонна, Бердібаев Асқар басқарған «Алтын дән Шиелі» қожалығы 330 гектар күріштің әр гектарынан 80 центнерден өнім алып, 2640 тонна, Рахман Қоңырат басқаратын «Алтын дән» шаруа қожалығы 200 гектар күріштің әр гектарынан 65 центнерден өнім алып, 1300 тонна күріш өндірді.
