– Жуырда Ақмола облысының Зеренді аймағында «AMANAT» жастар қанатының кезектен тыс VI съезіне батысқазақстандық белсенді жастармен бірге қатысу бақыты бұйырды. Алқалы жиында Мемлекет басшысы Қасым-Жомарт Тоқаев бейнежазба арқылы жастарға үндеу жолдап, съезге қатысушы делегаттарды құттықтады. Президентіміз бұрынғы «Жас Отан», яғни «Жастар Рухы» ресурстық орталықтарымен бірігіп жұмыс жасауы керегін айтты. Нәтижесінде VI кезектен тыс съездің шешімімен жастар қанатын трансформациялаудың жаңа бағдарламасы мақұлданып, жастар ұйымының атауы «Жастар Рухы» болып өзгертілді. Ықылым заманнан Алаштың атын танытқан бабалар ізін жалғап, ұрпақтан күткен үкілі үмітті ақтау керектігін шегелеп бергендей болды бұл атау. Үлгілі үрдістің жалғасы іспетті ұйымның жұмысын жандандыруға біз де атсалысамыз.
«Орал жастарымен» бірге бұған дейін де талай таудай істердің көшінде жүргенбіз. Енді «Жастар Рухы» деп атауы ғана өзгерген, бірақ миссиясы сол қалпындағы ұйыммен бұдан әрі де тізе қосып, бір жағадан бас, бір жеңнен қол шығарып қызмет атқармақпыз.
Иә, барша Қазақ елі елең етіп, жастардан тың өзгерістер күтіп отырғаны анық. Еліміздің болашақ көшбасшылары бас қосқан жиын жастардың бойындағы отансүйгіштік сезімді одан бетер маздатты. Енді осы күш-жігермен, көтеріңкі көңіл күймен игілікті істерімізді одан әрі жалғастырамыз.
