Батыс Қазақстан облыстық Өңірлік коммуникациялар қызметінің кезекті баспасөз мәжілісінде Жәнібек ауданының әкімі Азамат Сафималиев ауданда атқарылып жатқан жұмыстардан хабардар етті.
Өз баяндамасында Азамат Сафималиұлы ауданның әлеуметтік-экономикалық дамуы және алдағы жоспарлар туралы айтып өтті. Алдымен Жәнібектің негізгі әлеуметтік-экономикалық даму көрсеткіштеріне тоқталып, өнеркәсіп өнімдерінің көлемі – 283,8 млн, ауылшаруашылық өнімдерінің көлемі – 6 126,4 млн, негізгі капиталдағы инвестицияны игеру – 4 303,1 млн, құрылыс жұмысының көлемі – 2 420,0 млн теңгені құрағанын айтты. Ал ауылшаруашылығы саласындағы өнімдер көлемі былтырғыға қарағанда жоғарылағанын жеткізді. Бұдан әрі негізгі капиталға құйылған инвестиция туралы ақпарат беріп, меншіктің бүкіл нысандарындағы ұйымдар мен мекемелер негізгі капиталға биылғы 8 айда 4303,1 млн теңге инвестиция салғанын мәлімдеді. Бұл салада да өткен жылдың есепті кезеңімен салыстырғанда, жоғары нәтиже байқалған.
Кәсіпкерлік саласында атқарылған жұмыстарға тоқталған аудан әкімі:
– Жәнібек ауданында осы жылғы 1 қыркүйектегі мәлімет бойынша,1283 адам шағын кәсіпкерлікпен айналысуда. Өткен жылмен салыстырғанда 1,6 %-ға өскені байқалды. Аудан бойынша тіркелген шағын және орта кәсіпкерлік субъектілерінің саны – 895, оның ішінде шағын және орта кәсіпкерлікте жұмыспен қамтылғандар 1283 адамды құрап отыр. Кәсіпкерлік саласында жасалған жұмыстар көлемі 721 млн теңгені құрады, бұл алдыңғы жылмен салыстырғанда 23,2%-ға жоғары. Жалпы есептік кезеңде 151 жаңа жұмыс орны ашылды, – деді. Жерді пайдалану мәселесіне де басымдық берген әкімнің айтуынша, ауданның барлық жер көлемі 821 323 гектарды құрайды. Аудан бойынша егістікпен айналысатын «Елнұр» шаруа қожалығы биыл 100 гектар жер теліміне арпа дақылын, 100 гектар жерге судан шөбін, «ECOCLUB» ЖШС да 100 гектарға судан дақылын отырғызған. Пайдаланылмай жатқан жерлерді мемлекет меншігіне қайтару жұмыстары да жүргізіліп жатқанын айтты.
Аудан басшысы А.Сафималиев өз баяндамасында құрылыс, тұрғын үй-коммуналдық шаруашылығы және автомобиль жолдары, денсаулық сақтау, білім беру, мәдениет және спорт салалары бойынша жасалған жұмыстарды мәлімдеді.
Ағымдағы жылы Ұзынкөл ауылында қос пәтерлі 1 тұрғын үйдің құрылыс жұмыстары 2 ай мерзімдеаяқталған. Енді екі отбасы баспанамен қамтылатын болады. Сондай-ақ, жергілікті атқарушы органның тұрғын үй кезегіндегі баспанаға мұқтаж азаматтарды баспанамен қамту мақсатында Жәнібек ауылына – екі қабатты 2 тұрғын үйдің, ал Ақоба ауылдында 2 пәтерлі бір тұрғын үйдің құрылысына жобалық сметалық құжаттама жасақталып, сараптамадан өткен. Оған қоса ауыз су құбырының құрылысын дамыту аясында да жоспарлы жұмыстар жүргізіліп жатқанын білдік.
Жәнібектіктер түрлі бағдарламалардың да жемісін көруде. Атап айтқанда, «Отбасы банкі» арқылы іске асырылып жатқан «Бақытты отбасы» бағдарламасы бойынша 13 азамат – Орал қаласынан, екі азамат Жәнібек ауылынан тұрғын үйлер сатып алған. Биыл да белгілі бір санатттағы тұрғындар осы бағдарлама аясында өз мүмкіндіктерін жіберіп алмауға тырысуда.
Азамат Сафималұлы жол саласында да бірқатар жұмыстар жасалғанын жеткізіп, қолға алынған жобаларға арнайы тоқталды. Ал денсаулық сақтау саласындағы маман тапшылығы мәселесін штаттағы мамандарды қайта даярлау және «Дипломмен ауылға» бағдарламасы арқылы шешу көзделген. Әрбір салада қолға алынған жұмыстардың нәтижесі мен жоспарлы іс-шаралардан хабардар еткен аудан әкімі А.Сафималиев мемлекеттік қолдауды сезініп, туған жерлерін көркейтуге адал еңбектерімен үлес қосуға ниетті жастардың қатары артқанын да атап өтті.
