Дүниежүзілік денсаулық сақтау ұйымының статистикасы бойынша жер бетінде әрбір 40 секунд сайын бір адам өзіне қол жұмсайды екен. Ал Қазақстан суицид саны бойынша әлемде 20-орында тұр, соның ішінде 10-19 жастағы жасөспірімдер арасында 10-орынға тұрақтаған.
Астаналық полицейлер ғимараттан секірмек болған әйелді құтқарып қалды. Не үшін секірмек болғаны әлі жұмбақ. Тұрмыс тауқыметі ме, жоқ әлде психикалық ауытқу ма?
«Елордада әйел ғимарат үстіне шығып секірмек болған», – деп хабарлайды «ҚазАқпарат» тілшісі Нұр-Сұлтан қаласы полиция департаментінің баспасөз қызметіне сілтеме жасап. «1 тамыз күні сағат 15:02-де «102» каналына Бейбітшілік көшесінде орналасқан ғимаратқа шығып алған әйелдің секірмек болып жатқаны туралы хабар келді. Оқиға орнына жедел қызмет жіберіліп, әйелді құтқарудың сәті түсті», – деп хабарлайды полиция департаментінің баспасөз қызметінен. Сондай-ақ, ресми хабарламада суицид жасамақ болған әйелге психологиялық көмек көрсетілгені айтылған. Болған оқиғаға қатысты тексеру шарасы жүріп жатыр. Айта кетсек, биыл ақпанда елорда полицейлері көпірден секірмек болған бойжеткенді аман алып қалған еді. Ол аз десеңіз, көпқабатты үйлерден белгісіз себептермен құлап кетіп өлгендер қаншама.
Біреу тоңып, біреу тойып секірген қоғамда өмір сүріп жатырмыз. Шындығын айтайық, әлеуметтік жетімсіздік, тұрмыс қиындығы кей адамдарға әсер етуде. Шиеттей бала-шағасымен баспанасыз қаңғып жүрген отбасылар көп. Әділетсіз заң орындарына өкпелі ағайын да жетерлік. Ақ адал маңдай терімен тапқан еңбекақысын ала алмай сандалып жүргендер қаншама.
Қоғамдағы әділетсіздік осылай жалғаса берсе, күндердің күнінде ашынған пенделер ғимараттардың төбесіне, крандардың басына, көпірлердің үстіне шығып, биліктен өз құқығын талап етуі әбден мүмкін. Оны болдырмаудың бір жолы – Жаңа Қазақстанның жаңаша сипатта өркендеуі. Ол үшін ел сенімін арқалаған шенеуніктер әділ, турашыл болса жетіп жатыр.
