Гурбангулы Бердімұхамедов өз ұлын президенттікке ұсынды

  Түркіменстан президенті Гурбангулы Бердімұхамедовтің ұлы Сердар Бердімұхамедов сайлауда республика президенттігіне кандидат ретінде ұсынылды. Орталық Азияның жаңалықтар қызметі таратқан ақпаратқа қарағанда, мұндай шешім Түркіменстанның демократиялық партиясының кезектен тыс құрылтайында қабылданды. Осыған дейін аталған партия атынан Гурбангулы Бердымухамедов үш рет ел президенті болып сайланған. Түркіменстан президенті 11 ақпанда өткен Халықтық кеңестің кезектен тыс отырысында «жастарға мемлекет басқаруға жол беру керек екенін» айтып, президенттік қызметтен кететінін айтқан. 12 ақпанда елдің Орталық сайлау комиссиясы мерзімнен тыс президент сайлауы өтетінін айтып, оны 12 наурызға белгілеген. Сердар Бердімұхамедов былтыр қыркүйекте 40-қа толған. Тура бір жыл бұрын Сердардың саяси мансабы бірден өсіп, вице-премьерліктің және елдің маңызды тетіктерінің тізгінін ұстаған.