Құқық қорғау бағытын негізге алған еліміздегі кадет сыныптарының ұйымдастыруымен Алматы облысы Іле ауданы Нұрғиса Тілендиев ауылында №26 орта мектеп базасында «Тәуелсіздік – еркін елдің ұраны» атты аудандық семинар өтті. Нұрғиса Тілендиев ауылындағы №26 орта мектептегі практика жүзіндегі саптық сабаққа Іле ауданының жан-жақтан келген кадет басшылары қатысты. Желтоқсаншы Байниязов Бақыт Серікбайұлы, «Qazaqstan dauiri» газетінің бас редакторы Ертай Айғалиұлы қатысып, жас сарбаздарға тілектерін білдірді. Бұндай іс-шаралар өскелең ұрпақты Қазақстан Республикасының Қарулы күштеріне деген сүйіспеншіліктерін арттырып, отансүйгіштікке, Отан алдындағы қасиетті борышын адал орындауға тәрбиелейтіні сөзсіз. Шара барысында мектеп оқушылары әскери дайындықтары жағынан түрлі өнерлерін көрсетті. Семинар «Жас Сарбаз» 10, «А», 7, «А» сыныптарымен практика жүзінде саптық элементтерін, АК-74 қаруын жартылай бөлшектеп жинаудан және АК-74 қаруымен саптық элементтерін орындады. Сонымен қатар Абилдаев Такман Балтабекұлының жетекшілігімен шығыс жекпе-жегінен де өнерлерін паш етті. Шығыс жекпе-жегі оқушыларды тек қара күшке үйретпейді, қорғануға, психологиялық тұрғыда шыдамды, шымыр болуға, сабырлы болуға тәрбиелейді. Одан бөлек Іле ауданы Қараой ауылының қызметтік кинология басқармасының сарбаздары қонаққа келіп, мектеп оқушыларына иттермен жұмыс, шекарадағы жұмыс жайлы практика жүзінде іс-тәжірибелерімен бөлісті. Артынша Қасымжанова Шырын Ғизатханқызының «Тәуелсіздік – тұғырым» атты тәрбие сағаты өтіп, оқушылар өздерін жан-жақты білімдерін, болашаққа деген сенім мен ұмтылыстарын көрсетті.
«Іс-шараның мақсаты – өскелең ұрпақты елімізді сүйетін, келешекте мемлекетімізге адал қызмет ететін рухты, отансүйгіш азамат етіп тәрбиелеу», – деді ұйымдастырушы алғашқы әскери дайындық пәнінің оқытушы-ұйымдастырушысы, аға сержант Оразгалиев Аркаш Сергазинович. Бұдан бөлек қадірлі қонақтардың арасындағы Іле ауданы білім бөлімінің әдіскері, «Жас сарбаз» әскери патриоттық қозғалысының төрағасы Джантлеев Сейтжан пікірін білдіріп: «Қазіргі таңда 20- ға жуық кадет сыныптары ашылды. Қазақстан бойынша ең алғаш кадет сыныбы 2014 жылы осы Іле ауданында ашылды. Кадет сыныптарындығы оқушылар түске дейін сабақ оқып, түстен кейін әскери саптық, спорттық дайындықтары бойынша сабақтарына қатысады. Бұл жұмыстардың барлығы әскери бөліммен, министрлікпен, білім басқармасымен тығыз байланысты. Республикалық түрлі жарыстарға қатысып, өз өнерлерін шыңдай түсуде. Сонымен қатар мектеп бітірген кезде кадет сыныбында оқыған түлектерге арнайы сертификат беріп, әскери жоғары оқу орындарына түсетін болса, жеңілдік пен гранттар қарастырылған», – деді. Бұлайша балаға мектеп жасынан әскери тәрбие беру – керемет бастама. «Тәртіпке бағынған құл болмайды», – деп Бауыржан Момышұлы айтып кеткендей, патшасына бағыну, еліне бағыну, халқына бағыну – ұлы қасиет.
