Қазақстандық кәсіпқой боксшы Геннадий Головкин (41-1-1, 36 КО) Жапонияның Сайтама қаласында 9-ы сәуір күні өткен кәсіпқой бокс кешінде шаршы алаң иесі Риота Муратаны (16-2, 13 КО) 9 раундта нокаутқа жіберді. Кездесуден кейін Геннадий: «Бұл жолғы қарсыласым Олимпиада чемионы әрі WBA тұжырымы бойынша чемпион болды. Болды емес, қазір де чемпион. Бүгін соны рингте көрсетті. Жапония жерінде осындай үлкен спорт оқиғасы өткеніне қуаныштымын. Өз елдеріміздің жарқын өкілдері ретінде жақсы шоу көрсете алдық деп ойлаймын. Өз жанкүйерлеріме алғыс білдіргім келеді. Әсіресе Қазақстаннан арнайы келген жақтастарыма рахмет айтамын. Рахмет жігіттер! Алға, Қазақстан!» – деді. Жапония БАҚ-тарында Генаның Муратаға шапан жапқаны туралы талқылаулар жүріп жатыр. Мәселен, nikkansports.com сайты осыған орай мақала жариялап, онда Геннадий Головкиннің өз шапанын Муратаға жабу себебін GGG-нің өз сөзімен түсіндіріпті. Сонда Гена: «Біздің елде (Қазақстанда) өзіңнің көңілің толған адамға қазақы шапан жауып сый-сияпат көрсету дәстүрі бар, өйткені, шапан – қазақтың ұлттық киімі. Мен өз шапанымды сол себепті Муратаға жаптым. Бұл менің Муратаға көрсеткен құрметім. Себебі, мен оны қатты құрметтеймін. Мурата жүзі жылы, жымиып жүреді. Содан болар оған деген жақындықты сезіндім және оны керемет чемпион деп есептеймін. Соған орай оған чемпиондық белбеуін де қайтарып бердім. Ол соған лайық жолбарыс жүректі жапондық батыр», – депті. Қай елде жүрсе де, өзін «қазақпын» деп жүрген Генамыз, міне, осындай көңілі дархан азамат!
