Келіссөздің екінші раунды өтіп жатыр

     Белоруссияға жеткен Ресей мен Украина делегациясы келіссөз үстеліне қайта жайғасты. Ресей бұл келіссөзге үш ұсыныспен келгені мәлім болды. Оның біріншісі —әскери техника, екіншісі — гуманитарлық-халықаралық түйткіл, үшіншісі — саяси мәселелер. Ал Украина мемлекеті өзара ымыраға келіп, оқ атуды доғару, бейбіт тұрғындарды елден шығару үшін гуманитарлық дәліз ашуды ұйымдастыру мәселесін ортаға салмақ. Бұл жолы Украина делегациясы келіссөз бөлмесіне сенімді түрде кірді. Олардың мұнда әріптестерінен кейін, яғни асықпай келуінің сыры да осында. Өздеріне сенімді. Бұдан соң екі тарап та ілтипатпен амандасып, келіссөз үстеліне отырды.    Еске салсақ, бұған дейін екі ел арасында келіссөздің бірінші кезеңі өткен болатын. Украина президенті Владимир Зеленский Киевтің Мәскеумен өткен келіссөздері әзірге нәтижесіз екенін хабарлаған-ды.