Көркем гимнастика: Қыздар Азия чемпионатында топ жарды

Көркем гимнастика шеберлерінің бәсекесі Тайландтың Паттайя қаласында өтті. Қазақстан құрамасы командалық және көпсайыс жаттығуларында жақсы өнер көрсетті. Әсіресе жасөспірімдер қос бағытта да 1-орыннан көрінді. Ал жекелей сында Милана Парфилова топ жарды. Ол доппен жаттығу жарысына қатысқан болатын. Бұған қоса, Айым Мейіржанова мен Эрика Жайлауова күміс жүлдегер атанды. Олар сәйкесінше, булавамен және лентамен өнер көрсеткен еді. Ересектердің де көрсеткіші жаман емес. Қазақстан құрамасы командалық біріншілікте 2-орынға тұрақтаса, көпсайыс бәсекесінде үздік үштікті түйіндеді. Ал шымкенттік Елжана Тәниева лентамен жаттығуда алдына жан салмай, Азия чемпионы атанды.