Облыс орталығында санитарлық тазалықты сақтау жұмыстары жалғасып жатыр. «Арнаулы автобаза» ЖШС мамандары жолдың жүру бөлігі мен жиектерін құм мен қоқыстан тазартуда. Тазалық жұмыстарына 380-дей адам, 46 техника жұмылдырылған. Бұған қоса, жол жуатын функциясы бар 5 су себетін көлік тартылған. Кәсіпорын директорының орынбасары Ұзақ Тусаев жұмыстың кезең-кезеңмен жүргізілетінін атап айтты.
– Қазір сол жағалауда Махамбет пен Азаттық көшелерінде, оң жағалауда Сәтпаев пен Әбілхайыр хан көшелері тазартылуда. Көктемде күл-қоқыс көлемі айтарлықтай артады, қазіргі уақытта күн сайын 500 тоннаға дейін қоқыс жиналып жатыр, – деді Ұ. Тусаев.
Қалада нөсер жаңбырдан кейінгі суды сору жұмыстары да жалғасуда. Оған «Арнаулы автобаза» ЖШС-нің 5 техникасы және 22 вакуумды машинасы тартылған. Бүгінге дейін қала көшелерінен жалпы көлемі 27 600 текше метр жаңбыр суы сорылған.
