Мәулен Әшімбаев өзбекстандық әріптесімен кездесті

     Қазақстан Парламенті Сенатының Төрағасы Мәулен Әшімбаев Өзбекстан Республикасы Олий Мәжілісі Заң шығару палатасының Төрағасы Нурдинжон Исмоиловпен кездесті. Кездесу барысында Мәулен Әшімбаев: «Біздің Президенттеріміздің арқасында Қазақстан мен Өзбекстан арасындағы стратегиялық ынтымақтастық дәйекті дамып келеді. Бұл ретте парламентаралық диалогтың маңызы зор. Сондықтан Парламенттеріміздің өзара байланысы тұрақты және даму сипатына ие болды. Екі мемлекет басшыларының уағдаластығы нәтижесінде құрылған Парламентаралық ынтымақтастық кеңесі де екіжақты парламентаралық байланыстарды дамытуға қосымша серпін береді. Екі елдің мемлекет басшылары Қазақстан мен Өзбекстан арасындағы ынтымақтастықты белгілеп берді, бізге оны жоғары деңгейді заңнамалық органдардың байланыстары арқылы әрі қарай дамыту маңызды», – деді. Өз кезегінде Өзбекстан Олий Мәжілісі Заң шығару палатасының Төрағасы Нұрдинжон Исмоилов: «Қазақстан Президенті бастамашы болған реформаларды Өзбекстан тарапы құптап отыр. Қасым-Жомарт Тоқаевтың көптеген бастамалары тек Қазақстанға ғана емес, бүкіл Орталық Азия өңірі үшін маңызды. Парламентаралық ынтымақтастық кеңесі Қазақстан мен Өзбекстан арасындағы өзара қарым-қатынастарды нығайтуға елеулі үлес қосатынына сенім білдіремін»,— деді. Кездесу барысында екіжақты сипаттағы ынтымақтастық халықаралық алаңдардағы, оның ішінде ТМД ПАА аясындағы өзара іс-қимылмен толықтырылып, күшейтілетіні атап өтілді. Мәулен Әшімбаев биылғы 28-29 наурызда Алматы қаласында ТМД елдері Парламенттері басшыларының және бірқатар халықаралық парламенттік ұйымдардың қатысуымен өтетін ТМД ПАА Кеңесінің мерейтойлық отырысы өзара қарым-қатынастарды одан әрі дамытуға серпін беретінін айтты.