Жамбыл облысы Қордай ауданына қарасты Ноғайбай ауылының 286 отбасы өз пайларынан айырылып, жерсіз қалғандарына он бір жылдың жүзі болған. Оған «Казэксим групп» компаниясы жалған хаттама арқылы БТА банкке ауыл тұрғындарының пай үлесін кепілге қойып жіберуі басты себеп екен. «Жығылғанға жұдырық» демекші, ол аздай, банк ауыл тұрғындарының жерлерін аукционға шығарады. Аукцион туралы ауыл тұрғындарына ескертпеген, ол өрескел заңбұзушылық дейді ауыл тұрғындары. Осы кезде жергілікті сот орындаушылар іске араласып, бес мың гектардан астам егістік жерді тоқсан екі жастағы Қордай ауданының тұрғыны Дильда Шынтасова жиырма үш миллион теңгеге бағалап, қырық тоғыз жылға пайдалануға сатып алады. Бір таң қаларлығы бес лот бойынша жүрген аукцион санаулы секундтар арасында жүргізіліп, бір адамға берілген. Кейін белгілі болғандай, жерді нақ иеленушісі «Аврора» шаруа қожалығының бастығы Жанырхан Шынтасов Дильда Шынтасованың баласы болып шығады. Жеке кәсіпкер алған жерін құр жатқызбай егін егіп, жемісін жей бастайды. Алғашында пай үлестерін сұраған ауыл тұрғындарына садақа есебінде дивиденттерін екі рет берген көрінеді. Діндар адамның садақа есебінде бергені ауыл тұрғындарына ұнамайды. Олар өз жерлерін даулап сотқа арызданады. Бірақ сот оларды үшінші тарап ретінде қабылдайды. Сағызша созылған сот әлі күнге дейін жалғасып келеді. Ал кезінде жерді аукцион арқылы сатып алған Дильда Шынтасова бақилыққа аттанады. Мұрагерлікті әлі алмаған Жанырхан Шынтасов «нотариустар сот ісіне араласқысы келмейді» дегенмен түсіндірді. Екі қолға бір күрек таппаған ауыл тұрғындары жан-жақта босып жүр. «AMANAT» партиясының жанынан «Жер аманаты» комиссиясы құрылған кезде Ноғайбай ауылының тұрғындары енді мәселеміз шешілетін шығар деп үміттенген болатын. Алайда оларға жазған арыздың соңы жергілікті прокуратура жауабымен ғана шектеледі. «Балық басынан шіриді» демекші, бұл даудың артында кезінде халық ақшасын жеп кеткен үлкен шенділер тұруы әбден мүмкін. Сондықтан бұл мәселеге қатысты арнайы барып тиісті адамдармен, ауыл тұрғындарымен кездесіп, олардың жанайқайларын тыңдап қайттық. Алдағы уақытта бұл журналистік зерттеуімізді ары қарай жалғастыратын боламыз.
Президентіміздің жер мәселесінде латифундистердің жергілікті халыққа жасап жатқан әділетсіздіктерді тоқтату жөніндегі пәрменін орындаудағы болып жатқан келеңсіздіктер жетерлік. Аудан әкімі М.Мұсаевтың мемлекет басшысының тапсырмасын орындаудағы халыққа көрсеткен қолдауларын базбіреулер түсінбеген сыңайлы. Әкім өз тарапынан оларды сотқа берді. Алдағы уақытта әділ түрде шешіледі деген сенімдеміз.
