Соңғы кезде билік құрылымдарындағы маңызды лауазым иелері бірінен кейін бірі орындарын босатып жатыр. Бұны былайғы жұрт жақсы жаңалық ретінде қабылдап жатқаны жасырын емес. 2022 жылдың басты жаңалықтары ретінде креслоларын босатқан «алыптардың» ең басында Үкімет басшысы Асқар Мамин тұр. Ал одан да зорғысы, күллі әлемнің көзін алақандай қылған ҰҚК-ның басшысының «Отанға опасыздық жасады» деген айыппен тұтқындалуы еді.
Сондай жаңалықтардың бірі бүгін жария етілді. ҚР Президентінің баспасөз хатшысы Берік Уәли, әлеуметтік желі арқылы Орталық сайлау комиссиясы төрағасының қызметінен кеткендігін хабарлады. «Президент Қасым-Жомарт Тоқаевтың Жарлығымен Берік Имашев Орталық сайлау комиссиясының төрағасы қызметінен босатылды» делінген хабарламада. Кейбір сайттарда оның ұлы Әлжан Имашевтің жақында ғана «ҚТЖ-Жүк тасымалы» ЖШС-ның Бас директорының орынбасарлығы лауазымынан алынғандығын жазыпты. Арада біраз уақыт өткенде Берік Имашевтің өзі де орнын босатты.
Әлеуметтік желі беттерінде пікір білдірушілер арасында бұл қызметтік өзгерісті жағымды жаңалық ретінде қабылдап жатқандар көп. Жұрттың уәжіне құлақ түрсек, 2016 жылдан бері ОСК-ның төрағасы болған Берік Мәжитұлы елімізде әділ сайлау өткізуге ешқандай талпыныс жасамаған көрінеді. Сенімді ақпарат көздері ОСК-ның төрағалығына экс депутат Нұрлан Әбдіровтың тағайындалғандығын айтып жатыр.
