Өзбекстанда биыл «Махалла жобасы» бойынша халықты жұмыспен қамту мәселесіне айрықша көңіл бөлінетін болды. Бұл туралы Өзбекстан БАҚ-тары хабарлап жатыр. Таратылған ақпараттарда 2024 жылы 16 желтоқсанда Президент Шавкат Мирзиёевке банктердің қатысуымен махаллада тұрғындардың жұмысқа орналасуы мен табысын арттыру шаралары туралы ақпарат берілгендігі айтылуда. Енді нақты іске кірісіп жатыр. Аталмыш жобаның мақсаты 2025 жылы жалпы 5 миллион 200 мың адамды, соның ішінде банктер арқылы 3 миллионнан астам адамды жұмысқа орналастыру болып отыр.
Осы мақсатта 208 аудан және қала әкімдері мен банк басшылары халықты жұмысқа орналастыру және табысын арттыру бойынша ынтымақтастық келісіміне қол қойған. Онда тараптардың нақты құқықтары мен міндеттері көрсетілді.
Әрбір махалла үшін мақсатты көрсеткіштер белгіленді. Халықты жұмысқа орналастыруға бағытталған «махалла жобасы» бағдарламасы аясында бөлінетін 1 миллиард доллар несие ресурстары банктер мен аймақтар арасында бөлінді. Жоба әзірлеу, несие беру және халықты жұмысқа орналастыру бойынша аудан банкі басшыларына ай сайын тиімділік көрсеткіштері қойылды.
Енді Орталық банк төрағасы мен оның орынбасарлары аймақтарға шығып, жергілікті банктердің жұмыстарын жаңа тәсілмен ұйымдастырады. 2025 жылдың 1 ақпанына дейін аудан банктерінің филиалдарында махаллаға бағытталған бөлімдер құрылып, оларға «махалла банкирлері» тағайындалады. Сондай-ақ, әр ауылда олармен бірге жұмыс істейтін «көмекші-агенттер» таңдалып алынады. Аймақтық банктер мен аудан әкімдері халыққа дайын бизнес жобаларымен таныстырып, оларды іске асыру дағдыларын үйретеді.
«online-mahalla.uz», «bank-kredit.uz» және «soliq.uz» ақпараттық жүйелері біріктіріліп, жауапты тұлғалардың міндеттерінің орындалуы күн сайын талданып отырады. Сайттардың жазуынша, «Қанағаттанарлықсыз» жұмыс істейтін басшыларға шара қолданылатын болады». Осылайша өзбек көршілеріміз 2025 жылы халықты кедейліктен құтқаруға бел шеше кірісетін секілді.
