Әлемнің барлық мұсылман жамағаты асыға күтіп жүрген қасиетті де қадірлі Рамазан айының басталуына санаулы күндер қалды. Ол Қазақстан мұсылмандары діни басқармасының 2025 жылғы ораза кестесі бойынша көктемнің алғашқы күні басталмақ. Ортақ пәтуаға сәйкес, қасиетті Рамазан айы 1 наурызға түсіп тұр екен. Ал 26-нан 27-не қараған түн – қасиетті Қадір түні. 30 наурыз – Ораза айт мерекесі. Бас мүфти Наурызбай қажы Тағанұлының төрағалығымен өткен Қазақстан мұсылмандары діни басқармасының Төралқа мәжілісінде пітір садақасы еліміз бойынша екі келі ұнның орташа бағасы негізінде 655 теңге болып бекітілді. Ал Құрбан айт 6 маусымда басталады.
Рамазан – ақ пен қараны ажыратып, сауап пен күнәнің парқын көрсетіп, тура жолға бастайтын Құран Кәрім аяттары жерге түсе бастаған ай. Ораза айында адам баласы мол сауап жинап, Алланың рақымына кенелуге зор мүмкіндік беріледі. Мұсылмандарға тақуалық нұры құйылатын бірден-бір ай – Рамазан. Осы айда береке-ырыс мол. Себебі ораза ұстаған адам рухани тазарып, Құран мен дұғаны көбірек оқиды. Сондай-ақ істеген амалдарына есеп беріп, қайырымдылық, мейірімділік, сабырлық сияқты ізгі қасиеттер адам бойында қалыптасады. Мұхаммед пайғамбарымыз «Ораза ұстаушының ауыз ашқанға дейінгі, әділ басшының және жәбірленушінің дұғасы қайтарылмайды» деп айтқан. Ендеше ораза ұстап, мол сауап жинауға асығайық, ұстаған оразаларыңыз қабыл болсын, халайық!
