«Qazaqstan dauiri» газеті – менің ұзақ жылдардан бергі рухани сүйенішім, шығармашылық жолымдағы сенімді серігім. Әсіресе «Адай Ата – Отпан тау» тақырыбына айрықша қолдау көрсетіп, оның мән-маңызын оқырманға жүйелі жеткізіп келе жатқан ақпараттық алаң ретінде бұл басылымның менің шығармашылық ғұмырымдағы орны ерекше.
Менің мақалаларым мен қоғамдық ой-пікірлерімді дер кезінде оқырманға ұсынып, ұлттық мәселелерге қатысты толғаныстарымды халықпен табыстыруы – мен үшін үлкен қолдау. Кейде қаламгерге көп нәрсе керек емес: ойын еркін айтатын мінбері, сөзін тыңдайтын оқырманы, рухын демейтін ортасы болса жеткілікті. Осы тұрғыдан алғанда, «Qazaqstan dauiri» – мен үшін дайын мінбер, даңғыл жол.
Бұл газет – көңілімнің қуанышы мен шығармашылық жігерімнің бір арнасы, ұлттық ар мен намыстың шырағданы. Ұлттың сөзін ұлықтап, елдің көкейіндегі ойды дер кезінде қозғайтын басылымның қадірі де осында. Газеттің құрылтайшысы әрі басшысы, елімізге белгілі қоғам қайраткері, ел анасы Сәуле Мешітбайқызы апамыздың маған деген ықыласы мен шығармашылығыма көрсеткен қолдауының орны тіпті бөлек. Бұл ықыласты мен азаматтық жолыма деген сенім, ұлттық ойға деген құрмет деп қабылдаймын. Сәуле апамызға осы жылдар бойғы ерекше қолдауы мен жанашырлығы үшін шексіз алғысымды білдіремін!
Сондай-ақ редакция алқасына, журналистеріне, жалпы газет ұжымына шынайы ризашылығымды айтамын. Әрбір жарияланымның артында үлкен еңбек, жауапкершілік және оқырманға деген құрмет тұрғанын жақсы білемін. «Qazaqstan dauiri» – мен үшін жай ғана газет емес. Ол – сөзімді елге жеткізетін рухани көпір, ұлттық ойымды ортаға салатын қасиетті мінбер, шығармашылық жолымда демеу болған жанашыр орта. Қаламға қуат, ойға қанат берген осындай рухани серіктестік үшін алғысым шексіз. Газеттің ғұмыры ұзақ, беделі биік, оқырманы көп болсын! Ұлттық сөздің шырағын жағып, елдің рухын көтеретін қасиетті қызметі жалғаса берсін!
