Түркістан облысына Түркиядан арнайы делегация келді. Мақсат – өңірдің экономикалық әлеуетімен танысу, әрі іскерлік байланыс орнату. Аудан, қалаларды аралап, екіжақты келісім жасау да көзделген. Түркиялықтар алдымен Түркістан облысының Сайрам ауданында болып, мал бордақылап, ет өндіріп, экспортқа, ішкі нарыққа қой мен ірі қара мал етін беретін «Қайып ата» ЖШС-нің жұмысымен танысты.
Қазір мұнда 18 мыңға жуық ірі қара мал бордақыланып жатыр. Кәсіпорын жылына 7200 тонна ірі қара мал етін дайындауға қауһарлы. Бүгінде кәсіпорын етті Ресей, Иран, Өзбекстанға экспорттауда. Бұдан бөлек, бүгінде осындағы мал етін Қытай нарығына шығару үшін құжаттар рәсімделіп жатыр. 2021 жылдан бері аптасына 40 тонна ірі қара мал етін Өзбекстанға сатып жатқан кәсіпорын биыл жалпы 1500 тоннадан астам ет экспорттап үлгерген.
Жақында Атыраудағы мұнай өңдейтін зауытпен келісімшарт түзіп, мұздатылған, сүйексіз, бөлшектелген таза қой етін ваккумдап, 10 тоннасын жіберіпті. Жыл соңына дейін тапсырыс көлемі 30 тоннаға жетеді.
«Dogus Group» түрік компаниясының өкілдері Сайрамдағы кәсіпорындармен танысып, зерделеу жұмыстары жүргізілген соң, іскерлік байланысты нығайтуға уағдаласты.
