С.Жапаров қала атауын өзгертуге шешім қабылдады

   Қырғызстан президенті Садыр Жапаров министрлер кабинетінің жылды қорытындылау жиынында Исфана қаласының атауын өзгерту туралы шешімін жариялады. Оған енді мемлекеттік қайраткер Исхак Раззақов есімі беріледі. Бұл туралы ол: «Президент сайлауы кезінде үгіт-насихат жұмыстарын Раззақовтың туған жері — Баткеннен бастадым. Мемлекеттік қайраткердің 110 жылдығы құрметіне Исфана шаһарын Раззақов қаласы деп атау жөнінде шешім қабылдадым», — деді. «Белгілі саяси және мемлекеттік қайраткер Раззақов соғыстан кейін Қырғызстанның әлеуметтік-экономикалық, индустриялық, аграрлық, мәдени жағынан дамуына сүбелі үлес қосқан»,— деп жазады ақпарат агенттігі. Ол Қырғыз КСР компартиясы орталық комитетінің бірінші хатшысы болған, республика қаһарманы. Қазақстан да көрші айырқалпақтылар елінен үлгі алуы керек сияқты. Өйткені, бізде тарихи атауы қайтарылуы тиіс елдімекендер атауы жетерлік. Петопавлдың,  Павлодардың, Алматы облысындағы Ұйғыр ауданынынң атауларын өзгертуге биліктегілердің жүректері дауаламай-ақ келеді. «Сужүрек» әкім-қараларға: «Мына көршіміз қырғыз елінен үлгі-өнеге алыңдар!»— дегің келіп-ақ тұрады.