С.Мешітбайқызы осы қызметке тағайындалғанына көп уақыт бола қоймаған қала басшысын жаңа қызметімен құттықтап, жұмысына сәттілік тіледі. Кездесу барысында Сәуле Мешітбайқызы «Qazaqstan dauiri» халықаралық газетінің тарихымен таныстырып, қазіргі тыныс-тіршілігін, негізгі тақырыптары, бағыты жайлы баяндады. Сондай-ақ басылымның биылғы – 30, «Мөлдір бұлақ» журналының 20 жылдық мерейтойы жайлы айтып, той қарсаңында жарық көрген қос кітапты сыйға тартты.
– Сіздей елге танымал, көпке сыйлы, өңіріміздің құрметті азаматымен танысқаныма шын қуанып отырмын. Әңгіме барысында көптен бері естімеген ақыл-кеңеске, аталы сөзге құлақ түріп, өзіңізден біраз ғибрат алдым деп ойлаймын. Мен қашанда сіздердің басылыммен бірлесе жұмыс істеп, ортақ жобалар жүзеге асыруға қолдау білдіремін. Қала басшылығы «Qazaqstan dauiri»-мен тізе біріктіріп жұмыс істеуге дайын, – деді Б.Орынбеков.
Кездесуде көптеген тақырып, қоғамдағы қордаланған мәселелер қозғалып, кеткен кемшіліктің салдары, мәселені шешу жолдары әңгіме болды. Соңғы айларда облыс орталығындағы жаңадан қанат жайып келе жатқан 15-ықшамауданның төңірегі арыз-шағымнан, дау-дамайдан арылмай кетті. Әсіресе көпқабатты тұрғын үйлердің сапасына, жылыту жүйесіне қатысты сын көп. Қазір «Күлтөбеде күнде жиын», алайда мәселе анау айтқандай шешіле қойған жоқ. Өйткені мұндағы басты кемшілік – жобалудың дұрыс еместігінде. Істің басынан кеткен кемшілік бүгінге қордаланған күрделі мәселе болып жетіп отыр.
Ал қала әкімі Бақытжан Әмірбекұлы 15-ықшамаудан бойынша проблемалар облыс әкімінің толық бақылауында тұрғанын және өзі де күн сайын сонда барып, ондағы шаруаны зерделеп, тұрақты қадағалап отырғанын жеткізді. Мәселені шешу бағытындағы атқарылатын жұмыстың да аз еместігін айтып, біршама уақыт керек екенін де жасырмады.
Жалпы кездесуде негізінен бүгінгі ұрпақ тәрбиесі, әлеуметтік желінің әлегі, құрылыс саласындағы былықтар жайы сөз болып, басылым басшысы мен шаһар басшысы алдағы уақытта осы бағыттарда арнайы мақалалар ұйымдастырып отыруға уағдаласты.
