Қазақ Елінің Тәуелсіздігімен даңқұрдас, «Qazaqstan dauiri» газетінің 30 жылдың көлемінде жеткен жетістігімен қоса, рухани өсуінде өзгеге ұқсамас өз сипаты бар. Бүгінде күллі Түрік азаматтары, Қазақстанды «Атажұртымыз» деп тануына газеттің қосқан үлесі өте зор. «Qazaqstan dauiri» газетінің орны бөлек. Сонымен қоса, бұл газеттің республика мәселесімен бітеқайнасып кеткендігі соншама, тіпті мемлекеттік мәртебесін толық ала алмай отырған Тіл мәселесі, бөлшектеніп саудаға түсіп жатқан Жердің қайғысы, солқылдақтықтан солып бара жатқан Діннің қасіреті, еліктеумен ерекшелігін жоғалта бастаған Діл Болмысты да, жан-жақты айтып жақсы көтеріп жүр. Біраз жылдан бері редакция алқасымен «ұрпақ тәрбиесі» қақында қоян-қолтық жұмыс істеген сәттерімізге ризашылығымды білдіре кеткенді жөн көріп отырмын. Біздер ұйымдастырған «Алдаспан» клубының талқылаған – Тарих – Балабақша – Білім – Мектеп – жайындағы «Дөңгелек үстел» материалдары газет бетінде кең көлемде жарияланады. Газеттің 30 жылдық мерейтойының қарсаңында редакция ұжымын сәтті басқарып отырған Сәуле Мешітбайқызы мен Ертай Айғалиұлы мырзаларға алғыс айта отырып, келешекте мұнан да зор табыстарға жетулерін тілеймін.
