Төтенше жағдайлар комитеті қызметкерлерінің кәсіби мерекесіне орай Түркістан қаласындағы Оқушылар сарайында сурет салудан оқушылардың қалалық байқауы өтті. Оған қаладағы 30 мектептен сурет салуға бейім оқушылар жетекшілерімен бірге келді. Байқауға қатысушылар «Қауіпсіздік, өрттен қорғану, табиғатты төтенше жағдайдан қорғау» сияқты тақырыптарды өз қиялдарымен ақ қағазға түсірді.
«Оқушылардың сурет сала білуі олардың бойындағы шығармашылық еркіндік пен белсенділікті қалыптастырады және қауіпсіздік ережелерін сақтауға үйретеді. Сонымен қатар ауыр әрі қиындығы бар жұмыс саналатын төтенше жағдай комитеті қызметкерлерінің еңбегін бағалауға үйреткіміз келеді», – дейді Түркістан қалалық Оқушылар сарайының директоры Индира Сарқытқызы.
Екі сағатқа жуық сурет салған балалардың жұмыстарын облысымызға белгілі қылқалам шебері Мұрат Шаханбаев бастаған қазылар алқасы бағалады. Бағалау барысында олардың ой ұшқырлықтары және бейнелеуіне баса назар аударылды. Сайыстың қорытындысы бойынша жүлделі III орынды Байрам Хушудов пен Елизавета Финакова иеленсе, II орын Еркеназ Алтынбаева мен Ажар Нышанға бұйырды. Ал I орынды Сабрина Махкамова жеңіп алды. Сондай-ақ Дина Жолдыбаева мен Арайлым Әбдібек – үздік идея, Ақерке Жақан – жас суретші, Жанерке Алпысбай – үздік сурет, Зиеда Абдуганиева – жас суретші, Балкерім Аташбек пен Наргиза Рыскулова – үздік композиция атағына ие болды.
Жеңімпаздар мен барлық қатысушылар ұйымдастырушылардың дипломдарымен және құнды сыйлықтарымен марапатталды. Бұл шараға Төтенше жағдайлар департаментінің төтенше жағдайларды жою басқармасының басшысы, Азаматтық қорғау полковнигі Талғат Серікұлы арнайы қатысып, өзінің жылы лебізін білдірді. Төтенше жағдай тақырыбын өздерінің қылқаламдарына арқау еткен оқушылар алдағы уақытта оқыс оқиғалардың алдын алуға да өз үлестерін қосатын болады.
